ORANJESTAD – Riba e di dos dia di e Risaralda Bird Festival na Colombia, delegacion Arubiano encabesa pa Prome Minister Mike Eman a bishita e Parke Botanico di Universidad Tecnológica di Pereira. E experiencia tabata uno sumamente agradabel pa mucha, hoben y representantenan di gremionan cu a asisti.

Prome Minister Eman tabatin oportunidad, mescos cu mainta durante e conferencia, pa hiba palabra. Esaki ta banda di otro invitado special di e evento, como por ehempel, President di Colombia Juan Manuel Santos, Minister di Comercio y Gobernador di Pereira.

E Parke Botanico ta un atraccion grandi e departamento den zona cafetero di Colombia. E ta conta cu 13 hectare di hofinan cu ta cas pa 160 specie di parha. Un y tur a disfruta enormemente di e recorido cu a haya guia pa e expertonan di e parke. Prome Minister Eman a ser mira na mas di un ocasion expresando su admiracion y tambe sacando potret di e bestianan.

Naturalmente, e bishita tabatin un obhetivo adicional y profundo. Durante e encuentro a intercambia experiencia e idea cu profesionalnan den e tereno di medio ambiente, turismo y tambe parhanan. E ultimonan aki a comenta cu nan kier siña for di nos den industria turistico, mientras cu di nan banda, ta ofrece productonan cu por ta complementario pa turismo di Aruba.

E delegacion Arubiano cu ta inclui tambe President di ATIA, Sr. van Trigt y President di Aruba Bird Life Consevation, dr. Peterson, ta na Risaralda, departamento di Pereira Colombia, pa participa den e actividadnan di e festival, te cu diahuebs proximo. 

Expresionnan haci den e articulo aki no necesariamente ta refleha opinion di ArenaPoliti.co