Parlamentario Guillfred Besaril (MEP): “En bes di tira cu lodo sr. Dowers debe Pueblo splicacion!”
![GuillfredBesaril02](/cache/klixowatermark/0e54074374267feb9617ed5e726892a5.jpg)
Parlamentario Sr. Guillfred Besaril a habri siman lansando preguntanan critico den direccion di Minister di Husticia, kende siman pasa a permiti e preso peligroso Span-Ospino pasa un “Valentine’s Day” cu su famia.
Sr. Besaril a inicia e conferencia di prensa bisando cu e mandatario ta mandando un mensahe completamente robes pa comunidad di Aruba. Na luga di asumi su responsabilidad y sali padilanti dunando pueblo un suplicacion di e motibo dicon e la tuma e decision aki, e ciudadano minister a haña ta bon pa bay over na loke e sa haci miho, esta tira cu lodo!
A bira ora pa e mandatario di Husticia duna pueblo cara pa asina e ciudadanonan di Aruba por cuminsa na compronde ta pakico e ta tuma e tipo di decisionnan aki.
Parlamentario Besaril ta continua bisando cu: “Si e minister tabata un persona cu tabata tuma conseho manera e ta sugeri nos di MEP na haci, awe no lo tabata tin un divorcio den Partido AVP pa motibo cu su persona y un ex-colega minister no por a comunica na drechi cu otro!
E ciudadano minister a demostra un biaha mas di ta un persona cu no ta scucha conseho ni di e profesionalnan cu ta purba di gui’e, mucho menos di su mesun colega(nan) den Ministerraad. Mas bien e minister ta campeon den tira cu lodo riba tur cu tribi na trece e berdad padilanti.
Na mas di un ocasion e mandatario a tira culpa di e insiguridad riba nos isla riba otro. Sino ta riba e sistema di educacion, ta riba e mayornan. Sino ta e mayornan ta riba e situacion social. Sino ta esaki, e ta tire riba oposicion.
Tur hende ta fout menos su maneho. Nunca e mandatario a tribi di wak su mes den spiel y mira kico e mes por a haci na e situacion. Ta p’esey Aruba a sera un 2016 cu mas di 60 atraco y un sin fin di incidente cu arma di candela!
Si e parti di duna “verlof” na e detenido Span-Ospino ta parti di su maneho, anto e mandatario mester bin padilanti y splica con su maneho ta hinca den otro. Te cu e dia di awe nunca e minister di Husticia a duna Parlamento ni pueblo un splicacion tocante su maneho.
Na momento cu pueblo wordo confronta cu situacionnan incomprendibel manera esun di e “verlof” di un preso peligroso manera Span-Ospino, ta mas cu logico cu e pregunta cardinal cu ta lanta den comunidad ta “Pakico!”.
Span-Ospina ta un individuo cu a comete atraco riba hende, riba banco y a hasta wordo sentencia pa trafica den arma di candela. E tabata un criminal cu e prome oportunidad cu e la haña, a bira huy for di warda di polis y a costa pueblo di Aruba basta placa pa por a garantisa su siguridad y esun di comunidad general na momento di a mand’e Hulanda.
Ta mas cu logico cu e minister tin un obligacion na splica e dicon di su decision den un caso asina.
Definitivamente a yega ora pa e Minister di Husticia tene honor na su mes y por lo menos cuminsa na reconoce cu su maneho no a duna resultado cu pueblo tabata kier a mira. Sigui tira cu lodo no ta un opcion mas! Pueblo di berdad a fada di e situacion alarmante di criminalidad y na grito ta bisa: “TA BASTA!” Parlamentario Besaril a termina.
Expresionnan haci den e articulo aki no necesariamente ta refleha opinion di ArenaPoliti.co