Den rueda di prensa di Partido POR, drs. Marisol Lopez Tromp, relaciona cu locual el a trece dilanti cu den Gobierno falta maneho y coordinacion entre e mandatarionan el a lanza e pregunta “kico esey ta nifica pa mi den comunidad?” 

Lopez-Tromp a splica cu esey ta nifica cu e placa di e pagador di belasting cu nos tur ta pone den presupuesto di Aruba y cu nos tur ta paga pa proyectonan y trabaonan cu gobierno ta ehecuta, nos ta wak un situacion caminda cu proyectonan chikito of grandi sea nan ta pega, sea nan ta costa hopi mas tempo y hopi mas placa, sea nan a tranca of a para. Esey ta e realidad cu varios proyecto cu a wordo priminti cu a cuminza y cu no a termina. Drs. Lopez Tromp a sigui bisa cu pueblo ta keda puntra ki dia e proyecto ta termina, kico ta bay sosode, y cada bez tin un motibo, pero e motibo principal ta falta di coordinacion, no solamente entre ministernan pero tambe entre e departamentonan pa sa unda ta bay y ken ta haci kico y carga e responsabilidad tambe pa esaki. Na e momentonan aki por wak cuanto conflicto tin, problemanan na nivel nacional cu por a jega asina leu y nos prome minister no ta atende esakinan y mas bien ta dedicando na otro temanan cu por tin un interes mas politico, mas interes por ta di campaña, pero di otro banda e temanan pa cual e tey den e funcion aki no ta wordo soluciona. 

Al contrario, si bo laga cada minister solucione na su mes manera, bo por haya conflicto, drs. Lopez Tromp a splica. Bo por haya conflicto hasta entre bo ministernan. Y enbez di ta un rato keto y resolve esaki…e no ta sosode”, Marisol a expresa. El a sigui duna algun ehempel mas riba e punto aki. Diferente decision grandi ta cay pa nos pais. Por ehempel tempo cu a bin cu e ley di supervision financiero, tempo cu nos gobernantenan a dicidi di bay haci un reapertura di e refineria y asina por menciona mas, ta topiconan grandi. Lo bo spera pa tin un discusion nacional riba nan, pa asina por jega na un sosten den comunidad riba e topiconan aki.

“Kico a pasa en realidad cu por ehempel e parti di toezicht financiero riba nos pais? Sea bo por ta pro of bo ta contra, parlamento mes a wordo sorprendi tocante e topico aki. A haya nos cu un ley cu nos no a pidi pe como sifuera parlamento kier esey. Mientras tanto gobierno a acorda caba cera cierto acuerdonan caba y parlamento a haya su mes confronta cu un hecho”, Marisol a trece dilanti. Otro ehempel ta presupuesto di pais Aruba. E ta wordo aproba of desaproba. Tin parlamentario ta vota pro tin ta vota contra pero realidad ta cu cada fin di aña nos ta haya nos mes cu un presupuesto supletorio cu ta nifica, mescos cu den un cas di famia, gastonan ta bin acerca, tin di nan inespera, tin di nan cu concientemente ta tuma y ta sali mas hopi cu e placa cu bo tin. “Y na e momento ey gobierno ta bini na carera pa Parlamento na December pa pidi parlamentarionan aproba loke nos a gasta na miyones extra di bo placa di pagador di belasting, aprobe den pura na December, pasobra si no nos tin un problema, si no tur loke nos ta haci ta ilegal”, Lopez-Tromp a apunta.

Tin ora e parlamentarionan wak esaki mayoria bez e ta wordo aproba, tin bez no. Tin parlamentarionan no ta vota pe, pero tin cosnan aden cu no por preveni y tin cosnan aden cu ta decisionnan tuma cu gobierno no a pidi parlamento aprobacion pe.

Consecuentemente miyones y miyones ta placanan extra. “Asina mi por menciona hopi ehempel mas pa pueblo compronde pakico ta importante pa tin coordinacion, pa tin un maneho, muy en particular pa decision di cada proyecto mester pensa pa ken mi ta hacie? Ken ta bay traha eynan? Nos ta prepara pe? Nos famianan por cargue? Tin suficiente cas pa carga tur e famianan cu ta bin acerca? Tin suficiente banki na scol pa carga tur e consecuencianan por ehempel di hendenan cu ta bin biba na Aruba?” Marisol Lopez Tromp a menciona.

Expresionnan haci den e articulo aki no necesariamente ta refleha opinion di ArenaPoliti.co