ORANJESTAD - Minister Plenipotenciario di Aruba na Washington, drs. Andy Lee, a hunga un rol importante durante e bishita cu Prome Minister Mike Eman, Minister ing, Mike de Meza y nan delegacion a realisa pa Merca.

Na momento cu participacion di Aruba na "Caribbean Energy Security Summit" na Washington a bira oficial,  oficina di Minister Plenipotenciario a cuminsa traha riba un agenda cu ta encera reunionnan relaciona cu e tema di e cumbre y otro temanan importante pa Aruba. "Mi mester bisa cu e cumbre tabata uno sumamente exitoso pa Aruba. A resalta con Aruba a haya un bon acogida na Merca pa e maneho cu a bin ta hibando relaciona cu energia sostenibel, pa logra ta 100% dependiente di energia renobabel pa 2020. Aruba a wordo poni como ehempel pa region Caribense pa sigui e pasonan di maneho di e isla aki," Lee a comenta na final di e gira di e delegacion Arubano.

E delegacion a reuni cu diferente instancia, entre otro Departamento di Energia, y den e reunion diferente punto a wordo discuti. Tabata den e encuentro aki cu un apelacion a wordo haci na Aruba pa yuda den e agenda Caribense pa yega na un maneho di energia sostenibel, algo cu e delegacion di Aruba a afirma di ta dispuesto pa coopera mirando e experiencia acumula riba e tereno aki. Den e encuentro aki Ministernan Eman y de Meza a expresa cu nan ta spera cu pa fin di aña Aruba lo yega na tin un produccion halto di energia den forma limpi. "Di e forma aki Aruba ta bira un partner di Departamento di Energia pa yuda e paisnan Caribense."

A probecha cu tabata na Merca pa regla diferente encuentro cu sea politico of comision di Congreso y Senado, kendenan tambe a mustra hopi interes den e agenda di energia sostenibel y con Aruba ta logrando esaki. "Aruba ta un di e poco paisnan Caribense cu a logra realisa energia sostenibel di 30 porciento caba y e ta un reto pa realisa esaki, despues di planificacion. E ta rekeri di hopi esfuerso y convence e stakeholdernan riba e tereno pa traha hunto. E tabata un punto cu e Congregistanan Mericano tabata hopi interesa pa sa con Aruba a realisa esaki," drs. Andy Lee a duna di conoce.