Na varios ocashon nos por a tende y lesa tocante “inclushon” di nos hendenan cu Down Syndrome den nos sociedad. Pero e pregunta ta si nan ta compronde e nificacion di inclushon???

Con nos tin cu categorisa “inclushon general” den nos sociedad y con inclushon por yuda y influencia e bida di nos hendenan cu  “Down Syndrome?”

Prome cu tur cos ”inclushon di nos hendenan cu Down Syndrome” mester por cuminsa den nos sistema di enseñansa, caminda muchanan cu Down Syndrome mester por risibi nan educacion hunto cu muchanan cu no tin limitacion, cuminsando for di peuter school te cu e nivel mas halto den nos enseñansa. Esaki lo yuda desaroya e studiantenan cu Down Syndrome di tal manera cu e docentenan por descubri nan abilidad y talentonan, cual mayan y den futuro por forma nos hendenan cu Down Syndrome den adultonan cu por forma parti di nos mercado laboral sea como un empleado,  profeshonal, of doño di nan propio negoshi. Cu otro palabra nan, esta nos hendenan cu Down Syndrome tin e oportunidad di forma parti di e desaroyo den nos sociedad. Aki nos por pensa tin un guia special y begeleider pa e muchanan special aki.

Inclushon den nos sociedad cuminsando den nos sistema di enseñansa lo yuda evita / preveni “Bullying y descriminsashon” y crea mas compashon, comprension y inclushon den nos sociedad cual al final mester ta e meta, pa nos por tin un sociedad progresivo! 

Por constata tambe cu  gran parti di esnan cu Down Syndrome tin difficultad pa forma parti di nos mercado laboral, sea debi cu nan ta differente of nan abilidad ta limita. Tur esaki por wordo evita si tabata tin for di cuminsamento e formashon di inclushon hinka den nos sistema di enseñansa y den nos mercado laboral.

Tambe por constata cu acceso na servicio di cuido ora cu nan yega e edad di adulto of edad mas avansa ta bira dificil of asta imposibel.

Si tene cuenta cu tur loke cu ta bira dificil y asta causa limitashon den e bida di esnan cu Down Syndrome, e mensahe mester ta cu nos como sociedad mester realisa y accepta cu “inclushon general” di nos hendenan cu Down Syndrome lo kibra tur barera cu ta stroba e desaroyo den nan bida.

Pa por garantisa “Inclushon General” mi lo cuminsa traha riba un ley  iniciativa cu ta garantisa cu nos hendenan cu Down Syndrome mester di inclushon den nos Sistema di educacion (enseñansa), laboral, deporte, salud y cuido; igual cu hendenan cu no tin limitacion.

E ta un hecho cu mundialmente tin un lucha pa inclushon di nos muchanan cu Down Syndrome den e sistema di enseñansa riba tur nivel igual, cu muchanan sin limitacion, paso a keda comproba cu “incorporacion” a resulta miho pa hopi individual den nos sociedad, eliminando discriminashon, bullying y creando un mihor sociedad.

Ta spera cu ora di entrega e ley iniciativa aki di inclushon esaki lo conta cu sosten no solamente di parlamento pero tambe di nos sociedad completo.

Expresionnan haci den e articulo aki no necesariamente ta refleha opinion di ArenaPoliti.co