MEP: Awe 31 di maart ta di penultimo biaha cu nos mester paga pa e escandalo di garantianan di AVP
Awe 31 di maart 2017 Gobierno di Aruba pa di penultimo biaha lo mester bay paga un suma di 5.1 miyon dollar (9.2 miyon florin) y esaki relaciona cu e escandalo di e garantianan duna door di AVP den e añanan 80. Manera tur hende sa caba, durante Gabinete Eman I (1986-1988), un sin fin di garantianan a ser duna na e Mafianan Italiano y esaki relaciona cu e tres proyectonan hotelero Beta, Ramada y Plantation y cualnan tur a fracasa y laga den ruina atras.
Debe di 206 miyon dollar
Hecho ta cu asina cu Gabinete Oduber a asumi mandato na November 2001, nan a haya nan mes confronta cu un sentencia di Corte Internacional na Den Haag caminda mester a paga di inmediato (‘uitvoerbaar bij voorraad’) un suma di $ 206.000.000,00 (206 miyon dollar) pa tur e bagamunderianan cometi pa Gabinete Eman y partido AVP. Un suma astronomico cu a resulta imposibel pa e gobierno di MEP paga e momento ey.
Solucion garantianan
Sinembargo Gabinete Oduber, por medio di Minister President Nelson Oduber y Minister di Finanza Nilo Swaen, no a sinta yora, pero cu curashi y determinacion a bay Italia, a negocia cu e General Manager di SACE, Giorgio Tellini y a logra un reduccion di e debenan di garantia cu 100 miyon dollar. E acuerdo a encera cu lo paga 55 miyon dollar cash y e restante lo wordo paga durante 15 aña largo – te cu 31 di maart 2018 - na un suma di 5.1 miyon dollar (= 9.2 miyon florin) tur aña. Pues awe 31 di maart ta e penultimo bes cu nos mester paga e suma aki cu tabata fruta y resultado di un maneho descabeya y iresponsabel di e gobierno di Henny Eman y su consehero Mike Eman.
Otro tragedia na caminda
Sinembargo otro aña maart - na momento cu caba di paga henter e debenan di garantianan aki – pais Aruba lo wordo confronta cu un otro tragedia di pago di bagamunderia cometi pa AVP, ya cu entrante 2018 henter comunidad lo mester bay cuminsa paga pa e debenan di e proyectonan PPP, cu ta suma na 90 miyon florin pa aña y esaki durante 25 pa 29 aña largo. Pues asina nos por mira cu nos pais nunca mas lo por haya alivio di paga y sigui paga pa debenan cu AVP ta crea den forma descabeya na momento cu nan asumi gobernacion di nos pais. Conclusion: Debe, garantia y desaster financiero ta sinonimo na AVP!
Expresionnan haci den e articulo aki no necesariamente ta refleha opinion di ArenaPoliti.co