Andin Bikker (POR): Kenny Montero a bin reforza e team di POR pa restaura seguridad pa nos pueblo
![AndinBikker09](/cache/klixowatermark/168cfe08c61b31b511cc64dc9c255ed5.jpg)
Andin Bikker, di Partido POR e Plataforma Forza Nobo, a duna un caluroso bon bini, durante e conferencia di prensa diamars mainta, cu a haci introduccion di otro candidato di POR, cu ta señor Kenny Montero.
Bikker a bisa cu “Un persona no ta un pais y un pais no ta un persona” y el a bisa cu el a wak den e palabranan di Kenny Montero cu el señala, caminda su curazon ta, cu e tin hopi pasion pa dedica na diferente tema cu ta biba den pueblo manera e animalnan cu ta riba caya, nos grandinan, nos hubentud y adictonan ambulante, cu ta tematicanan cu ora POR cana den pueblo por mira cu comunidad ta pidi atencion pa nan. Bikker a señala cu pa loke ta trata inseguridad riba nos pais, sigur Kenny Montero ta bin reforza e team di POR pa restaura e seguridad cu nos pueblo tanto ta anhela. “Pa ocho añanan nos ta ripara cu e seguridad di nos pueblo ta completamente ausente, y esnan cu ta na encargo aworaki tin tur atencion riba otro cosnan, pero no ta duna suficiente atencion na seguridad. Pesey mi kier yama bon bini na sr. Kenny Montero cu tur su dedicacion y su pasion pa e temanan cu e tin den su curazon pa bin reforza e team aki, nos Partido POR e Plataforma Forza Nobo”, Andin Bikker a bisa. Segun Bikker, POR lo dedica atencion na cada un di e aspectonan cu Kenny Montero a menciona, y mas cu tur pa restaura e seguridad pa nos digno pueblo.
Expresionnan haci den e articulo aki no necesariamente ta refleha opinion di ArenaPoliti.co