Resumen di e Relato Mensual di Mei 2017   

Desaroyo monetario 
Den e luna di Mei 2017, e cantidad di placa den circulacion a baha cu Afl. 59,9 miyon te na Afl. 4.077,9 miyon, compara cu April 2017. Esaki a resulta door di menos activo domestico netto (-Afl. 72,0 miyon) y un expansion den e reserve di divisa netto (+Afl. 12,0 miyon).

E bahada den e activo domestico netto a surgi for di un reduccion den transaccionnan no relata na credito (-Afl. 63,0 miyon) y credito domestico cu a mengua (-Afl. 8,9 miyon). E caida den transaccionnan no relata na credito a wordo causa principalmente door di subidanan den e asina jama “shareholders’ equity”, otro debenan y tambe transaccionan di clearing. Credito domestico a disminui door di menos credito bancario na e sector priva (-Afl. 21,7 miyon), cual a wordo parcialmente neutralisa pa un crecemento den credito bancario netto na e sector publico (+Afl. 12,7 miyon).

Credito bancario na e sector priva a cay principalmenta door di menos credito na empresa (-Afl. 25,1 miyon). Sinembargo, hipoteca pa vivienda a subi (+Afl. 3,6 miyon). E expansion den credito bancario netto na e sector publico (+Afl. 12,7 miyon) a surgi door di un bahada den e depositonan di gobierno (-Afl. 8,6 miyon).

E crecemento den e reserva di divisa netto di e sector bancario (+Afl. 12,0 miyon) ta debi na compra netto di divisa for di publico (+Afl. 193,2 miyon), primordialmente relaciona cu entrada for di turismo, servicio di transportacion y transferencia netto for di cuentanan den exterior di companianan local. Esaki a wordo mitiga pa un gran parti pa benta netto di divisa na publico (-Afl. 181,2 miyon), principalmente relaciona cu entrada for di importacion di mercancia, otro servicionan, transaccionnan relata na otro inversionnan y e asina jama ‘income account’.

Inflacion 
E nivel general di prijs, cu ta wordo midi door di e indice di prijs di consumo, a registra un bahada di 0,1 porciento den e luna di Mei 2017, compara cu Mei 2016. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Di otro banda, e componentenan “Transporte”, “Cuminda y bebida no-alcoholico”, “Recreacion y Cultura” y “Educacion” a registra un subida. Si exclui e componentenan di cuminda y energia for di e indice di prijs di consumo, inflacion ta mustra un crecemento di 0,6 porciento compara cu Mei 2016. Pa loke ta trata e promedio anual di e tasa di inflacion, esaki a registra un bahada di 0,4 porciento na Mei 2017, compara cu un caida di 0.6 porciento na April 2017.

Turismo 
Na Mei 2017, e cantidad di turista a registra 80.975 bishitante, cual ta 11 bishitante mas cu na Mei 2016. Esaki a resulta principalmente door di un subida di 9,5 porciento den turista for di e mercado Norte Americano (+5.036 bishitante). Di otro banda, e mercado Latino America registra un reduccion di 26,2 porciento (-4.567 bishitante).

E caida den e mercado Latino Americano a wordo principalmente causa pa menos bishitante for di Venezuela (-5.998 bishitante of -55,7 porciento). E crecemento den e mercado Norte Americano a resulta for di un expansion den bishitante for di Merca (+4.885 bishitante of 9,7 porciento).

E cantidad di turista crucero a registra un subida di 31.294 te na 51.756 bishitante na Mei 2017, compara cu Mei 2016. E cantidad di barconan a expande for di 8 na Mei 2016 pa 19 na Mei 2017.

Entrada di Gobierno 
Na Mei 2017, entrada di gobierno a suma Afl. 162,1 miyon, cual ta Afl. 10,7 miyon mas compara cu e mesun luna di e aña anterior. E subida aki a resulta for di un aumento den entrada di impuesto (+Afl. 23,2 miyon) y un bahada den entrada no relata na impuesto (-Afl. 12,5 miyon).

E expansion den entrada di impuesto ta relata principalmente na mas impuesto riba ganashi (+Afl. 9,2 miyon), impuesto riba propiedad (+Afl. 4.3 miyon), impuesto riba entrada (+Afl. 2,5 miyon) y impuesto riba divisa (+Afl. 2,3 miyon).


Banco Central di Aruba

5 September 2017

Expresionnan haci den e articulo aki no necesariamente ta refleha opinion di ArenaPoliti.co