Un informacion cu a sali publica den Amigoe di dia 31 di maart 2015: “PvdA wil Rijkscommissie voor integriteit”.
Partij van de Arbeid a propone na Tweede Kamer di Hulanda pa institui un Comision di Reino cu lo mester promove integridad na Corsow, St. Maarten y Aruba. E comision lo mester tin e mes un tareanan, y probablemente e mes un mandato tambe cu Cft tin actualmente, y e lo mester wordo nombra door di e Conseho di Ministro di Reino y ancla den un Decreto di Reino (Rijkswet).

PvdA a lansa e proposicion aki despues di cu Tweede Kamer a debati riba e problema cu e “veiligheidsdienst” Corsow a confronta ultimamente, y na unda lasonan entre crimen organisa y politiconan a wordo cuestiona. Remarcabel ta con e integridad di henter nos pueblo a wordo atacha door di declaracion di entre otro sr. Bosman cu a laga sa cu: “…garantie van de PvdA dat de leden van de commissie ook daadwerkelijk integer en deskundig zijn, aangezien er juist in het Caribisch gebied een tekort is aan deskundigen op dat gebied. Hij herhaalde een eerder voorstel om een Rijksofficier te benoemen die toezicht houdt op integriteit”.

Na januari 2015 durante e conferencia di parlamentonan di Reino (IPKO) a palabra cu lo institui un comision di integridad di Reino Hulandes. Nos tur por corda con e delegacion di Parlamento di Aruba a pone nos cara na berguensa, y a duna muestra atrobe di un falta di madurez politico ora di apunta un representante di Aruba den e comision.

Durante e mesun conferencia atrobe a haci palabracion pa awor aki sí instala un "ombudsman" na Aruba. A bin resulta cu Aruba ta e unico partner den Reino cu no tin un "ombudsman"!
Y otro berguensa pa Aruba ta ora Presidente di Parlamento ta declara cu e topico aki ta riba e agenda politico pa ya caba 10 aña. En todo caso e meta di un "ombudsman" ta pa señala problemanan den nos comunidad, y asina duna parlamento e responsabilidad di yama e Minister pa responsabilisa su maneho.

Personalmente mi ta considera e proposicion di nombra un “Rijksofficier” pa reglamenta y controla integridad di nos gobernacion, un acto di paternalismo di parti di Hulanda, y tambe un falta di realismo pa e situacion actual na Aruba,  y un falta di respet pa palabracion haci durante e conferencia di IPKO. Mi por compronde cu combatimento di crimen organisa ta dificil. Hulanda tin amplio experiencia den e tereno aki si nos waak e cantidad di “ehecucion” cu ta tumando lugar na Hulanda den baho mundo mes.

E falta di realismo y respet tin di haber cu na Aruba tin caba organonan manera Ministerio Publico y Polis, cu tin como tarea pa combati criminalidad. Si Hulanda tin e impresion y informacion cu e organonan aki no ta cumpli debidamente cu nan trabou, anto lo mi sugeri pa reinforsa e dos instancianan aki. Duna nan e ayudo financiero, tecnico, material y tambe personal pa nan por ehecuta nan trabou debidamente.

Di otro banda gobierno y parlamento mester implementa for once and for always palabracionnan haci den pasado.
No por ta asina cu Bermudez ta lubida di presupuesta e funcion di "ombudsman" den e presupuesto 2015.

Mi ta bolbe reitera cu mester cuminsa delinea reglanan di "Good Governance" na Aruba, y cu institutonan manera Raad van Advies y Rekenkamer mester haña e respet y atencion necesario di parti di gobierno pa asina Parlamento di Aruba por funciona debidamente.


Den nomber di Union Patriotico Progresista – U.P.P.
Candelario A. S. D. - Booshi - Wever
Brazil, april 6, 2015

Expresionnan haci den e articulo aki no necesariamente ta refleha opinion di ArenaPoliti.co