MEP ta sigui busca loke no tin y ta mustra cu ta sensacion nan kier! 

E reunionnan di preparacion pa trata presupuesto a demostra un biaha mas e diferencia grandi entre MEP y AVP. Mientras cu AVP ta buscando e miho formanan pa restructura finansa publico, MEP ta busca sensacion. Mientras AVP ta tene e prioridadnan pa nos pais bon cla, MEP ta djis busca forma pa crea un discucion tras di otro den speransa di crea intrankilidad y haya simpatia den pueblo. Loke MEP no ta parse di compronde ta cu PUEBLO kier CAMBIO! Pueblo kier pa stop e situacion cu mas cu mitar di henter presupuesto di Aruba (casi 700 miyon florin) ta bay pa cubri costonan di e aparato di gobierno. MEP ta lubida cu nan propio ex-lider di partido y ex-prome minister  tabata keha cu 80 cen di cada florin ta bay pa paga empleadonan publico. E diferencia entre AVP y MEP ta cu AVP ta busca un solucion di largo plazo, mientras ta tene cuenta cu e trahadornan y nan famia. Mientras cu MEP ta busca e solucion den mas MEDIDA, AVP ta busca e solucion den cambionan den organisacion di aparato di gobierno pa baha e gastonan den forma structural.

SENSACION
Den e reunionnan e siman aki e fraccion di AVP a interoga e minister di finansa riba e forma cu e kier aumenta entrada y con e ta pensa di introduci normanan pa guia finansa publico den futuro. Diferente miembro di e fraccion di AVP kier a sa mas di e desicionnan cu gobierno a tuma y na ki momento nan lo bini na vigor. MEP a busca tur forma pa haya sa si tin medida den e estilo di MEP na caminda. Pero cada biaha di nobo nan a keda decepciona. Un di e miembronan di MEP a puntra si ta bay kita e "vakantieuitkering" di trahadornan di gobierno. Ela haya contesta di minister cu esey no ta bay sosode. Un otro a puntra si e minister ta haya cu e presupuesto ta realistico. E contesta tabata: "Si no mi no lo a entregu'e". Bez tras bez e minister a mustra conocemento, experiencia y un trankilidad enorme cu ta desarma e pio contrincante. Den e situacion aki no a keda MEP nada otro cu cuminsa ataka e minister den prensa. Obviamente un strategia barata y bou nivel, cu ta mustra un falta di dominio di e materia di finansa publico y un incapacidad pa keda serio y al caso. E forma cu MEP ta anda cu e materia di presupuesto no ta duna mucho speransa pa e tratamento di presupuesto. E capacidad di MEP no ta parse di ta bay mas leu cu busca puntonan pa haci buya cun'e. Lamentabelmente e echonan ta contradeci nan: e presupuesto ta dentro di e normanan financiero palabra pa 2014-2018 y na caminda pa un "Presupuesto Balansa" na 2017/2018. Esey tambe lo ta e prome biaha den historia cu ta logra un presupuesto balansa den forma structural. Tambe lo ta prome biaha den historia cu ta cuminsa paga debe di e ultimo 29 aña di nos pais. Apesar di tur desordo cu MEP ta haci, e realidad ta cu e reforma financiero ta bayendo den e direccion cu a bisa pueblo prome cu eleccion. Apesar di tur cos cu ta sosode, Aruba ta riba e bon caminda. E no ta bay ta facil cu partidonan cu ta stroba ki ora cu por. Pero AVP ta sigui riba e caminda aki manera a bisa pueblo!

Expresionnan haci den e articulo aki no necesariamente ta refleha opinion di ArenaPoliti.co