Pa medio di un aanwijzing minister Plasterk a dirigi gobernador di Sint Maarten pa investiga e integridad di varios politico riba e isla.

Ta trata aki di candidatonan pa e gabinete nobo di Theo Heyliger, lider di partido UP, ganador di e ultimo eleccion parlamentario na Sint Maarten.

Ta di cuater biaha den ultimo 2 aña cu Hulanda ta haci uso di un aanwijzing pa asina interveni riba e region caribense di Reino Hulandes. 

Diabierna ultimo Rijksministerraad a dicidi cu lo investiga e candidatonan pa e gabinete nobo di Theo Heyliger prome cu nan por wordo nombra den nan funcion. Candidatonan aki lo mester pasa door di un screening prome, cu lo wordo realisa pa expertonan Hulandes.

Prosperidad na promer lugar
Tweede Kamer ta teme cu Theo Heyliger lo bira prome minister di Sint Maarten a pesar di ta un figura basta controversial. Minister Plasterk a vocifera cu e situacion na Sint Maarten ta uno cu por tin consequencia negativo pa e estado di derecho di Sint Maarten. Prosperidad di e pueblo y e situacion economico tambe lo por sufri si algo no wordo hasi, segun e mandatario Hulandes.


Fraude
Heyliger ta wordo sospecha di a comete fraude cu voto den e ultimo eleccion na Sint Maarten. Durante e eleccion anterior na 2010 tambe fraude a wordo constata. Augustus ultimo juez Koen Luijks a dicidi cu no lo por sigui cu e caso mirando cu OM no lo a hasi su debido trabow di investiga Theo Heyliger. Segun juez, Theo Heyliger lo ta ricibiendo trato preferencial y ta wordo protegi, siendo cu lo tin mas cu suficiente base pa entama un investigacion.


Aanwijzing
E aanwijzing aki lo resulta den un investigacion profundo cu lo tin como meta final pa clarifica con ta para cu e integridad di Heyliger y varios otro politico. Te ora cu un screening tuma luga, gobernador Holiday no lo tin mag di aproba e miembronan di e gabinete. E postulacion aki di Plasterk ta conta riba sosten di varios partido politico y parlamentarionan prominente na Hulanda.


Plan di accion
Mientras cu e screening ta tuma lugar, minister Plasterk di asuntonan di Reino hunto cu expertonan Hulandes lo prepara un plan di accion cu tin como meta pa fortalese e poder judicial na Sint Maarten. Na november venidero lo trata esaki den e siguiente Rijksministerraad.

Expresionnan haci den e articulo aki no necesariamente ta refleha opinion di ArenaPoliti.co