Otmar Oduber: Interes mutuo ta demostra disponibilidad pa estrecha lasonan entre Hulanda y Cuba usando Aruba como gateway Caribense
Durante su bishita diplomatico na Cuba, Minister Otmar Oduber a tene un reunion na cooperativa Antonio Maceo. E recepcion di e delegacion procedente di Aruba tabata uno sumamanete bon unda a intercambia varios informacion.
Aruba di su banda a comparti algun reto cu nos isla ta confronta manera por ehempel nos scarcedad di tereno y tambe e situacion di scarcedad di awa. E representantenan di Cuba a splica con nan ta maneha e situacion aki y a combersa tambe riba posibel colaboracion pa nos cunukeronan tambe por yega na cierto convenionan. Cu presencia di Embahada Hulandes, Vice Minister di Agricultura di Cuba, a demostra interes special pa haya sa mas riba e experticionan di Hulanda specialmente riba e maneho di awa.
Probechando presencia di tur tres partido a elabora riba e lasonan cu por estrecha entre Hulanda y Cuba unda Aruba naturlamente ta e gateway den Caribe. E tabata un reunion cu a demostra varios punto cu tur envolvi por siña di otro.
Aruba a demostra e disponibilidad di por comparti nos conocemento riba e tereno di Turismo. Cuba cu tin mas cu 12 miyon habitante y ta ricibi 3 miyon turista pa aña, nos cu 120 mil habitante ta ricibi 1.7 miyon turista pa aña. Minister Oduber ta bisa “Ta cifranan bastante impresionante y ta mira cu tin un interess mutuo entre tur e partidonan. Esaki ta importante den e caso cu mester firma MoU’s pa mehora e calidad di e intercambio di conocemento cu por exsisti entre Aruba, Hulanda y Cuba.”
Expresionnan haci den e articulo aki no necesariamente ta refleha opinion di ArenaPoliti.co