Gabinete Mike Eman II hopi orguyoso di e programa aki 

ORANJESTAD – Pueblo di Aruba por ta hopi orguyoso di e servicio cu ta wordo brinda door di Bus di Salud na Aruba. E ta un recomendacion cu PAHO ta haci na diferente pais pa di e forma aki hiba e control di salud mas cerca di pueblo.

Aruba ta un di e poconan den e area aki cu tin e Bus di Salud, cu a wordo introduci oficialmente na september di 2012, bou di encargo di dr. Luis Arango. “Nos ta bay cumpli 3 aña di operacion sin interupcion, atendiendo den e periodo aki casi 16 mil pashent caba, segun nos registronan,” dr. Luis Arango cu hopi orguyo a informa den un entrevista durante Accion di Bario.

For di momento cu Gabinete Mike Eman, bou maneho di Minister di Salud Publico Richard Visser, a introduci e Bus di Salud na pueblo, el a cay na agrado mirando e concepto di hiba e control di salud den barionan pero tambe durante cierto actividadnan grandi.

E 16 mil clientenan cu Bus di Salud tin atendi ta “un record importante” ya cu e ta mas o menos 15 porciento di e poblacion. Y a constata tambe, cu tin ciudadanonan cu ta bishitando e Bus di Salud pa di dos biaha, haciendo di e forma aki un “follow up” riba nan estado di salud.

A bishita tur 8 districto di Aruba caba y ta trata di realisa bishitanan balansa den tur e areanan aki, pero tin areanan mas grandi cu ta wordo bishita mas biaha cu otronan. Tambe a inclui bishita na scolnan basico y secundario. Loke ta remarcabel cu cada biaha ta bini mas peticion for di sector horeca y comercial pa Bus di Salud presenta na nan actividadnan of simplemente haci uzo di nan servicio. “Esaki pasobra hopi biaha a wordo bisa cu e condicion di salud di empleadonan ta un condicion di productividad y un beneficio enorme pa henter e pais.” Pues un trahado saludabel ta produci mas miho cu un persona cu no ta hiba un sano.

E factornan di enfoke di Bus di Salud ta e factornan di riesgo pa malesanan cronico, cu ta e problema principal di salud na Aruba. No mester lubida, segun dr. Arango a splica, cu 33% di e fayecementonan na Aruba ta a causa di malesanan cardiovascular. Esaki tin di haci cu condicionnan di bida, e estilo di bida. P’esey cierto preguntanan cu ta wordo haci riba e formulario cu e clientenan tin cu yena prome cu nan wordo atendi paden. Despues, segun dokter Arango a splica, ta haci algun evaluacion pa haya e factornan di riesgo na tempo, y duna sugerencia y cambionan di conducta pa evita e riesgonan. Na final, e idea ta pa hiba un bida preventivo, educando e clientenan. El a constata si cu e comunidad a bin ta comprondiendo e mensahe di e proyecto aki y ta aserca e Bus di Salud. “Esey riba su mes pa nos ta un logro inmenso pa bisa cu nos ta canando hopi dilanti di otro paisnan den regio,” segun dr. Arango.

Pashentnan cu ta wordo atendi door di Bus di Salud por wordo parti den dos grupo. E prome ta esnan cu ta bini cu un malesa diagnostica caba pa cual nan ta hayando un tratamento. Mayoria di nan pregunta ta relaciona cu e efectonan di e tratamentonan di malesanan cronico y consecuencianan ora cu nan stop cu e tratamento. E dos malesanan cronico di Aruba ta esnan Cardiovascular (33%) y Cancer (23% di mortalidad). E efecto mas dañino di esaki ta e mortalidad prematuro, entre 50 y 60 aña. E ta un reto grandi pa traha riba prevencion di salud, pa cambia e efecto aki riba e capital humano. E di dos grupo ta esnan cu kier sa si nan tin un problema di salud.

Lesnan importante cu a bin ta hayando for di comunidad cu e Bus di Salud ta cu e clientenan kier haya mas informacion riba prevencion, pero con pa modifica patronchinan di bida, manera miho alimentacion y actividadnan fisico. “Nos tin un Gobierno cu ta apoya iniciativanan di prevencion, cu ta yuda baha e malesanan cronico na Aruba.”

Expresionnan haci den e articulo aki no necesariamente ta refleha opinion di ArenaPoliti.co