Gabinete ME II: Oranjestad tin un aire nobo y dinamico di progreso pa goso di bishitante y local
ORANJESTAD – Yegada di e di tres streetcar pa Oranjestad ta representa e avance den un iniciativa cu a demostra di tin su luga den tanto e pakete cu ta producto Aruba, como den e goso di e propio comunidad Arubano. E idea como recurso pa aumenta e fluho di turista pa centro di ciudad a traha manera cu a pensa y no ta straño pa wak e streetcarnan completamente yen ta core den Caya Betico Croes.
Nan ta forma parti di e vision di progreso pa centro di ciudad hunto cu renobacion di caya principal, monumento, area di waf pa crucero y incentivo pa actividad comercial. E resultado ta visibel den yegada di negoshinan nobo manera Zara y Vélez cu ta representa inversionnan cuantioso den nos economia y creacion di cuponan di trabou.
Tambe tin e ampliacion di marcanan ya existente, como por ehempel Aruba Aloë y Mango cu a reconoce den e vision di Gobierno, e oportunidad pa hiba nan compania, na un nivel mas halto. Cada elemento menciona ta forma parti di e mehoracion di producto Aruba pa consolidacion di Aruba su posicion den e mercado turistico internacional.
Gabinete Mike Eman II ta masha contento cu un pieza mas di e vision ta keda concreta pa beneficio di economia y comunidad di Aruba. Manera priminti, e streetcar no ta solamente pa turistanan bishita tiendanan den Caya G. F. Betico Croes, pero tambe pa trahadonan di e area.
Nan por para nan auto na e parkeo general ubica na Weststraat y pa medio di e streetcar, yega na nan luga di trabou. Esaki na su bes ta alivia e congestionamento di trafico den centro di ciudad y ta permiti consumidornan pa yega cu nan auto mas cerca di e tienda cu nan ta desea di bishita.
Riba plataformanan social tambe por mira regularmente con nos mesun hendenan ta subi streetcar y dal un keiro cu muchanan. Nan ta confesa cu ta sinti dushi pa admira e manera estupendo con caya grandi ta mustra, despues cu a keda asina largo den abandono.
Arubianonan ta sinti nan mes orguyoso di por biba den un isla cu ta conta cu e centro di ciudad di mas bunita y agradabel den Caribe, cu luganan pa haci compras, pero tambe pa come, bebe y interactua, of djis relaha.
Expresionnan haci den e articulo aki no necesariamente ta refleha opinion di ArenaPoliti.co