Evelyn Wever-Croes (MEP): Fraccion MEP a pidi reunion pa trata contract pa construccion di green corridor
Green Corridor ta otro proyecto sumamente cuestionable
ORANJESTAD -- Manera ta conoci un di e projectonan PPP cu ta den fase di destaho publico ta esun di green corridor. Ta asina cu Minister Sevinger a dirigi un carta na parlamento pa pidi apoderacion pasobra ta bai pasa e suma acorda di 292 miyon florin. Remarcabel di esaki ta e hecho cu e minister concerni ta pidiendo un apoderacion sin suma! Pues ta un 'carte blanche' e ta pidiendo den e tempo di crisis aki
CORPUCION?
Locual ta mas cuestionabel ta e motibonan cu e minister ta menciona den su carta, y e falta di transparencia cu e kier duna. Tin hopi remarque y pregunta cu ta bin door di e actuacion aki.
Fraccion di MEP ta di opinion cu un projecto di e magnitud manera esun di Green Corridor bo no por duna un apoderacion pa haya un suma di placa cu no ta defini. A para bira un custumber cu di parti mandatarionan di AVP ta surpasa sumanan acorda y despues kier bin pidi mas placa sin cu ta splica dicon y cuanto placa mas esaki ta hiba.
E minister a scohe deliberadamente pa NO cambia e ley, pero a scohe pa djis informa Parlamento, y pone limite di tempo tambe. Dos siman e carta ta drumi na Parlamento y despues nan por firma y asina aumenta nos debe. Ta importante pa Parlamentp wordo bon informa pa expertonan pa evita cu Gobierno ta pasa Parlamento un fastball.
"E situacion financiero di nos pais ta uno precario y ta pa e motibo aki nos no ta di acuerdo pa acorda sumanan grandi sin debido splicacion. Den cuadro di esaki nos a entrega un peticion pa reunion publico cu Minister Sevinger. Nos fraccion ta spera cu presidente di parlamento por honra esaki mas pronto posibel" segun lider di Fraccion di MEP Evelyn Wever-Croes.
Expresionnan haci den e articulo aki no necesariamente ta refleha opinion di ArenaPoliti.co