ORANJESTAD –  Entrante otro siman diaranson e BBO lo mester wordo aumenta cu mas di 1%.

HISTORIA DI BBO
BBO di 3% a wordo introdusi na anja 2007, pa modernisa e forma di cobra belasting na Aruba, y pa garantisa cu gobierno ta haya su placa mas eficientemente. E tempo ey sr. Nilo Swaen y sr. Nel Oduber a introdusi tambe varios compensacion, manera reduccion di loonbelasting, reduccion di inkomstenbelasting, reduccion di winstbelasting, reduccion di invoerrechten. E tempo ey Mike Eman a organisa protestanan feros den henter nos pais, pa purba stroba introduccion di e BBO. Protesta, manifestacion y te hasta nan a ocupa sala di Parlamento. Nan a rementa donderboos den wc na Parlamento causando danjo na tuberianan, di miles y miles di florin. Varios di e Parlamentarionan cu awor ta den Parlamento pa AVP tabata den e grupo nan di manifestante ey. Tambe nan a purba sende Bestuurskantoor na candela. Y no lubida con Mike Eman a kibra baricada di polis, faltando respet na autoridad. Tur pa demonisa e BBO y manipula cu mente di hende.

Mike Eman den anja di eleccion 2009 a priminti cu e ta bai elimina e BBO, y a cuminsa hasi e prome paso, reduccion te na mitar. Y eynan e problemanan financiero di nos pais a cuminsa. Sin embargo Mike Eman no a cumpli cu su promesa falso di elimina BBO. Na december di 2014 el’a aumenta e BBO cu 1% introduciendo e health tax, y asina e BBO a yega na 2.5% bek.

PARLAMENTARIONAN DI AVP
E aumentonan di BBO no a keda te eynan. E parlamentarionan di AVP a pidi luna pasa pa hisa e BBO cu 1 % mas, pues 3.5%! A resulta cu CFT a laga s acu e 1% ey no ta suficiente y dia 4 di juni a recomenda pa hisa e BBO te na 4%. Hopi mas cu locual MEP mes a introdusi. Y awor e momento di berdad ta yegando: banda di ken nan ta bai para?

LEY NO A YEGA PARLAMENTO AINDA
E ley mientras tanto tin 4 siman den preparacion y ainda nan no por keda cla cune, y dentro di 6 dia e ley aki mester drenta na vigor. Acaso kier purba bulldoze un ley asina importante? Un ley cu ta mustra cu Mike Eman y tur e 29 candidatonan di AVP ta manipulado?
Ademas, nan kier sconde e aumento aki den un aumento di e health tax, pero si desde december cu e health tax a drenta na vigor e placa no a yega AZV, ta unda tur e placa aki a bai anto?
Tur esakinan tin e fraccion di MEP hopi preocupa, especialmente mirando e bancarota financiero cu Mike Eman ta hibando nos pais aden y e miseria cu e ta causando na Aruba. Unda e pueblo lo saca e placa pa paga 4% di BBO? Y e pregunta mas crucial ta: UNDA TUR E PLACA A BAI?

Expresionnan haci den e articulo aki no necesariamente ta refleha opinion di ArenaPoliti.co