Minister Oduber: Otro proyecto maritimo grandi pa Aruba
Nos isla ta preparando pa yama e barco “Pacific Mistral” bon bini
Diahuebs mainta Minister Otmar Oduber a wordo informa dor di Director di Directie Scheepvaart Aruba cu Directie Scheepvaart Aruba y oficina di Havenmeester a sigura un otro proyecto grandi pa Aruba.
E barco Pacific Mistral ta un drillship super moderno y nobo. E barco tabata operando na Brasil contrata pa e compania Petrobras y awor cu trabounan a caba na Brasil a dicidi pa keda den Caribe “awaiting orders”.
Directie Scheepvaart cohuntamente cu Dammers Group of Companies di Corsow a aserca e doñonan di e barco, cu ta Pacific Drilling di Houston, Texas, pa sondia e posibilidad pa nan usa Aruba pa staciona e barco. Directie Scheepvaart y Havenmeester a logra convence Pacific Drilling ayera mainta. Pacific Mistral lo ta na Aruba pa un aña inicialmente. Esaki ta significa na anker gelden alrededor di 170 mil Florin. E barco lo tin 15 pa 20 miembro di tripulacion abordo y ta calcula cu lo drop entre 400mil pa 600mil Florin na Aruba. Na e momentonan aki Directie Scheepvaart y Dammers-Group of Companies ta negociando cu Pacific Drilling pa ubica un di dos drill ship, Pacific Meltem, na Aruba. Si esey logra ta kere cu Aruba por genera rond 1 miyon Florin na ingreso.
E proyecto aki a sigui e esun exitoso di e compania Hulandes Seaway Heavy Lifting cu ainda ta tumando lugar na e veld di gas “Perla” pa zuid di Aruba den awanan Venezolano. E proyecto aki ya caba a genera alrededor di 2.8 miyon Florin na servicionan cumpra na Aruba manera carrentals, taxis, hotels, cuminda, gastonan portuario etc.
Minister Oduber ta hopi contento cu e rapport Maritieme Toekomst van Aruba a cuminsa duna frutonan asina liher. Tambe Minister Oduber ta hopi contento cu e cambionan positivo cu a tuma lugar na Directie Scheepvaart. E vision pa crea un pilar economico di e sector maritimo ta mustrando dia pa dia mas factibel. “Mi ta felicita tur cu ta trahando na Directie Scheepvaart pa e bon trabou”.
Pacific Mistral lo ta ancra diasabra den e area di mantenacion di Aruba.
Expresionnan haci den e articulo aki no necesariamente ta refleha opinion di ArenaPoliti.co