ORANJESTAD – Prome Minister Mike Eman a wordo invita como orador den e Global Forum tumando luga na Toronto, Canada. Durante cumbre a trata topiconan economico di importancia nacional, pero tambe di indole internacional y tambe a trata topcionan importante manera clima y sostenibilidad energetico, economico y social. E foro, organisa pa ‘The International Economic Forum of the Americas a conta cu presencia di personalidadnan importante internacionalmente riba asuntonan economico.

Prome Minister Eman durante su bishita na Toronto, Canada, a wordo compaña pa Consul General di Reino Hulandes, Sr. Anne Gerard van Leeuwen, kende tin como parti di su trabou traha na interes di Aruba tambe, como parti di Reino Hulandes.

Sr. van Leeuwen a splica cu e rol di Aruba na e momentonan aki na Canada ta uno interesante. Esaki mirando cu e Prome Minister di Aruba sr. Mike Eman a wordo invita pa hiba palabra den e cumbre cu a conta cu presencia di personahenan grandi mundialmente manera entre otro ex-vice Presidente Mericano Al Gore, ex-presidente Mexicano Felipe Calderon y estadista Israeli Shimon Peres kende tabata tin un reunion cu Prome Minister di Aruba. Sr. Van Leeuwen a keda hopi impresiona cu e facilidad cu e mandatario di Aruba ta hiba palabra mey-mey di personalidadnan conoci di henter e continente aki.

Temanan principal di e cumbre ta maneho sostenibel, cambio climatico y con ‘Island Nations’ ta atende cu e tipo di retonan aki.

Consul General van Leeuwen a splica den un entrevista cu como diplomatico di Reino Hulandes, e ta representa tur paisnan den Reino. Den su caso, su funcion mas importante ta pa atende cu e interesnan economico di Reino Hulandes na Canada. Establecimentonan comercial di Aruba cu ta interesa pa haci negoshi na Canada of busca partnernan na Canada, semper por conta riba apoyo di e Consulado di Reino Hulandes, ya cu nan conoce e mercado hopi bon. Tin basta interes, segun el a splica, principalmente na Toronto, pa loke ta e experticio cu tin na Hulanda, pero tambe e inovacion y creatividad cu tin den e mundo comercial Hulandes. 

Expresionnan haci den e articulo aki no necesariamente ta refleha opinion di ArenaPoliti.co