Miembronan di MEP ta drumi, soña y lanta cu fantasianan di corupcion y abuso di placa di pueblo. Nan a keda asina traumatisa door di tur e corupcion y violacion di ley di comptabilidad cometi durante di e gobernacion di MEP, cu nan deseo di mas grandi ta pa gara AVP den cosnan similar. E raport di WODC a documenta e tantisimo casonan di corupcion y abuso di poder bou gobierno di MEP y cu a envolve e ministernan directamente. Nan no por bisa cu e no ta berdad!

SOÑO DI MEP vs REALIDAD
E soño di MEP pa cara AVP den casonan di corupcion of maluso di fondonan publico ta asina fuerte cu den tur proyecto nan ta wak corupcion of mal uso di fondonan. Recientemente e lider di MEP mes a haci un calculacion di e costo di e "Green Corridor", e caminda nobo entre Playa y San Nicolas. E lider di MEP a yega na e conclusion cu e costo no ta 292 miyon pa contruccion y mantencion pa 18 aña manera Parlamento a aproba, pero cu e suma ta hopi mas. Ela calcula cu 440 miyon ta disparce den saco di politiconan y hendenan liga na AVP. Riba peticion di un miembro di Parlamento di AVP, Banco Central a manda Parlamento un carta den cual e ta splica y corrigi e acusacion di e lider di MEP completamente. Banco Central ta bisa bon cla cu e suma di e construccion y mantencion ta manera Parlamento a aproba. E acusacion y gañamento di e liderdi MEP atrobe a wordo para. Pero e no ta siña di tur e biahanan cu a gar'e ta gaña.

CFT
Awor e lider di MEP a coi un frase di un raport di CFT pa bisa cu di tur e placa cu gobierno a inverti ta un procent so a bay den infrastructura. E remarke aki di e lider di MEP y di CFT, ta confirma cu nan no ta di acuerdo cu hopi di e placa cu gobierno a inverti den forsa di compra di pueblo, tabata inversionnan necesario pa stimula economia y mehora e calidad di bida di pueblo, compara cu na unda MEP a lagu'e na fin di 2009. Pa mehora forsa di compra mey mey di e crisis cu MEP a laga nos pais aden y pa stimula economia, AVP den gobierno y Parlamento, a scohe pa baha BBO. Ora esaki no a duna e resultado desea, a dicidi di yuda e Pueblo directamente. A baha prijs di awa y coriente, a duna trahadornan di gobierno e indexering cu nan no a haya pa 7 aña y a drecha e posicion di miles di trahado; a duna trahadornan den sector priva ayudo directo den na salario den forma di e "reparatietoeslag". Tambe a duna pensionadonan, viuda y huerfanonan esaki. A hisa e onderstand y mehora e entrada di mamanan soltera y nan jiunan. A duna tur mucha di scol e "schoolgeld toelage". Awor a caba di baha e prima cu tur trahado ta paga pa seguro medico. Tur esaki cu ta yega un suma di mas cu 500 miyon pa aña, tambe ta parti di e inversion den nos hendenan. Esaki tambe MEP ta contra! Esaki ta loke MEP a y ta yama malgastamento di placa. E realidad ta cu door di inverti directamente den forsa di compra di majoria di Pueblo, nan por a tene cabez riba awa durante di e crisis cu MEP a laga nos pais aden. E realidad ta cu ta door di e extra placa aki cu pueblo a haya pa usa diariamente, negoshinan tambe a haya benta y a keda riba pia.  Economia a sigui draai. Segun Banco Central esaki (= consumo) ta e didos factor mas importante den crecemento economico. Anto MEP ta acusa cu e placa aki a disparce. E pregunta di MEP na unda e placa a bay tin un contesta: e placa a bay pa Pueblo. Y MEP tabata contra!

Expresionnan haci den e articulo aki no necesariamente ta refleha opinion di ArenaPoliti.co