Ministerio di Cultura: Fundacion Museo Arubano nobo e vehiculo pa eleva sector cultural na Aruba
E structura nobo di Fundacion Museo Arubano ta e capa pa tur museo na Aruba funciona bou di dje. A inicia cu e proceso pa esaki y durante un reunion Minister Otmar Oduber a enfatisa e cambionan positivo cu esaki lo trece cu ne.
Na aña 2008, Berns Museum Management a crea un rapport na unda ta conseha museo, como departamento di gobierno, pa comberti den un fundacion. Un rapport cu ya caba e tempo ey a carga sosten di e empleadonan di museo. Actualmente kier propone pa crea un fundacion pa maneha tur e museonan na Aruba enbes di cada un riba nan mes. Minister Oduber ta sigui splica: “Intencion ta si pa mantene cada un cu nan maneho, nan propio presupuesto, pero ta raporta pa productividad y eficiencia na e Fundacion Museo Arubano.”
Pa fin di luna di augustus 2015 un rapport mester ta cla cu tur e consehonan pa concretisa e forma nobo y proceso nobo bou cual Fundacion Museo Arubano lo bay funciona. Ta importante pa cumpli cu e fecha stipula mirando cu mester entrega presupuesto 2016-2017 na september proximo. E reunionnan awor lo continua a base semanal pa asina logra e meta aki, unda den luna di september por cuminsa e tramite cu e aprobacionnan necesario, pa por logra cu e incorporacion aki ta tuma luga prome cu fin di aña.
E mandatario ta sigui bisa: “Cu e proceso aki bo ta crea oportunidadnan nobo. Actualmente museonan ta wordo subsidia pa Gobierno di Aruba, esaki ta mara e entidadnan cu nan no por busca fondonan adicional. Ley di compatibilidad no ta permiti esaki, sinembargo si bo ta den un fundacion si lo por.”
Un di e preocupacionnan grandi di e museonan ta e posicion huridico di e empleadonan publico. Minister Oduber a splica cu a percura pa sigura posicion huridico di tur trahado garantisando cu nan ta mantene nan pensioen y beneficionan.
Sr. Oduber ta finalisa bisando :“Museo Arkeologico tin un status importante den nos comunidad unda nan a ricibi inversionnan cuantioso di fondonan Europeo den pasado. Ta netamente e exito aki nos lo kier mira comparti henter e ekipo cu awor nos lo conoce como e Fundacion Museo Aruba.”
Expresionnan haci den e articulo aki no necesariamente ta refleha opinion di ArenaPoliti.co