MIKE EMAN TA BUSCANDO TRABOU DEN EXTERIOR!

ORANJESTAD – Ora bo sinta pensa kiko Mike Eman ta hasiendo den ultimo simannan bo ta realisa, cu ya e no ta trahando pa Aruba mas. Ariba custia y placa di pueblo, Mike Eman ta profilando su mes y trahando un nomber internacional pa su mes. Esaki pasobra Mike Eman tambe ta conciente cu su tempo den politica ta pasando y cu aki na Aruba casi ningun hende ta ker’e mas y cu dia e bai for di politica ta den exterior so e por bai traha, pasobra na Aruba mes su credibilidad ta ZERO. E por bai traha kizas den cualkier organisacion international cu por usa su fantasianan y papiamento bunita ariba plataforma mundial of regional. Kizas pa un Carbon War Room mes, of hasta Hulanda lo por dune un trabou como embahador di Reino un caminda.



PRIORIDADNAN

Pasobra loke e mester papia di dje mes y cu ta importante pa tur pais e no ta papia ariba dje ora e ta profila den exterior. Dicon e no ta conta Nacionnan Uni cu awe su mal maneho a conduci cu nos debe nacional a redobla? Y cu Aruba tin e mesun status cu Grecia pa loke ta nos situacion di debe y crisis financiero. Cu e desempleo ta halto, ensejansa den decadensia, cuido di salud malo,  y un pobresa halto. Pa no papia di nivel di criminalidad mes. Tur dia tin turista ta wordo horta y atraca akinan y nada ta wordo hasi. En corto: con malo calidad di bida a bira desde cu Mike Eman ta den gobierno!

“Talves ta tempo pa desenmascara Mike Eman internacionalmente tambe, pasobra aki na Aruba ningun hende no ta ker’e mas. E por ta interesante pa hasi, sin embargo esey no tin nos prioridad. Locual ami kier mira como prioridad ta cu tur mucha por haya cupo na scolnan, cu studiantenan haya nan fianza di estudio na tempo, cu esnan di menos recurso por duna nan yiunan uniform, tas, y material di scol pa nan por cuminsa scol. Pa nos crea empleo pa nos hendenan, y asina combati pobresa. Pa nos uni forsa y combati e ola di criminalidad cu ta azotando nos pais, mientras nos gobierno ta sinta man crusa. Y Mike Eman, miho nos lag’e den exterior, den su mundo di fantasia, pasobra aki na Aruba ta daño so e ta causa”, según líder di MEP, Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co