Awor cu e ley di CAFT a wordo aproba, ya caba Mike Eman ta cla pa suta pueblo cu un belasting nobo. E belasting riba TUR transaccion di banco. Esaki ta un di e 24 medidanan cu nan a anuncia y asina tambe crea espacio pa medidanan EXTRA wordo implementa!

PAKIKO MESTER E BELASTING NOBO AKI?
Gobierno a laga sa cu mester bai cobra esaki pa por financia tur projectonan di PPP manera e Green Corridor. Loke ta hopi raro den e ponencia aki ta cu tur e tempo cu Fondo Desaroyo Aruba ta existi nunca NO a saca ni un depchi extra for di pueblo pa paga pa proyecto. Esaki kiermeen cu mientras pueblo ta pagando hopi belasting caba, awor kier bai cobra pueblo dobbel pa paga projectonan cu ta financieramente NO sostenibel! Algo di condena y rechasa cu tur forsa pasobra na un manera premedita ta chica placa for di pueblo sin cu di berdad mester! Anto ni siquiera pa proyectonan BON pa nos comunidad manera un scol na Noord. Pasobra pa e scol na Noord no tin placa ma.

E gobierno di promer minister Mike Eman a priminti nos pueblo na aña 2009 cu lo NO bin cu medida. Nan lo elimina BBO, nan lo reduci e tarifa di coriente cu 25% 'from day one', nan lo mehora e poder di compra y baha e costo di bida. Awe e mesun Mike Eman a traiciona confianza di nos pueblo y a lubida loke e mes a priminti nos pueblo. Cu CAFT su gobierno lo bai den historia pa castiga pueblo sin misericordia.

E ta incomprendibel cu awor kier bai cobra pueblo riba cada pago cu bai hasi. Financial Transaction Tax no solamente lo bai afecta pueblo su cartera severamente, pero lo crea hopi pobresa y tambe lo bai lanta ola di criminalidad! Fraccion di MEP a dicidi caba cu no lo bai aproba e ley burdugo aki!!

Expresionnan haci den e articulo aki no necesariamente ta refleha opinion di ArenaPoliti.co