Ministerio di Cultura tin e atencion debido pa restauracion di nos monumentonan. Un empuhe grandi a wordo haci, unda un ekipo grandi ta traha riba e proyecto di restaura nos California Lighthouse cual ta tambe un di e atraccion turistico mas conoci riba nos isla.

Diahuebs mainta Stichting Monumentenfonds Aruba y ECOARUBA Line Development NV cu Monumentenbureau como testigo a firma un acuerdo pa asina cuminsa cu e trabounan di restauracion di California Lighthouse.

E faro na Noord ta cumpliendo 100 aña y a yega e momento pa e conoce un restauracion completo. Lastimamente e ultimo añanan California Lighthouse a conoce deterioro drastico. Monumentenfonds como doño di e edificio ya tin 3 aña trahando riba e proyecto caminda cu na 2012 hunto cu IMD Aruba a traha un masterplan pa e area. Na 2013 a cuminsa busca fondo pa por restaura e lighthouse cerca Nationaal Restauratie Fonds na Hulanda. Na 2014 a logra concretisa e peticion pa fondonan y a cumpra e Lighthouse for di pais Aruba. Monumentenbureau a keda cu e encargo pa lidera e proyecto aki.

Sra. Ing. Yvonne Webb di Monumentenbureau a remarca cu durante e estudio di California Lichthouse a resulta cu na aña 1915 e tabata traha di piedra sin un pleister riba dje. Sra. Webb ta splica: "Nos a dicidi di bay bek te na aña 1930 mas of menos na momento cu e prome capa di pleister a wordo poni y a scoge tambe e mesun color di e tempo ey pa pone awor riba e faro. Pues California Lighthouse lo haya su color original bek."

Despues di e destaho publico cu a tuma luga awor a otorga e proyecto aki na ECOARUBA Line Development NV. E ta un proyecto di mas of menos 1 miyon Florin y ta planea pa cuminsa aproximadamente pa 24 di september 2015. Cu esaki tambe e contratista a haya 170 dia cual ta aproximadamente 8 luna pa finalisa cu e trabou.

Na final California Lighthouse cu ta un di nos puntonan turistico principal lo keda habri pa publico por disfruta dje. Intencion ta pa patrimonionan cultural bolbe bin bek den nan gloria di antaño, den bon condicion, pa e publico general por haci uzo di nan y siña conoce, y sa nos historia miho.

Expresionnan haci den e articulo aki no necesariamente ta refleha opinion di ArenaPoliti.co