Booshi Wever (UPP): UPP ta considera cu Raad van State toch ta defende otorgamento di e KB pa Aruba
Gobierno di Reino na 2014 a otorga e gobierno di Mike E. un KB.
Gobierno di Reino na 2014 a otorga e gobierno di Mike E. un KB.
Gobierno di Reino a declara cu mester a interveni pa evita un derumbe total di e finansas publico di pais Aruba (waarborgfunktie) a base di investigacion conduci pa Cft, pero tambe a base di rapportnan di IMF, S&P y Fitch. Parlamentarionan hulandes encabesa pa miembronan di D’66, a cuestiona e forma di proceder aki di e Gobierno di Reino y a demanda un investigacion imparcial door di Raad van State.
Raad van State den su CONSEHO publica recientemente, a yega na e conclusion cu otorgamento di e KB no ta legal. Pa desvia atencion atrobe, Mike Eman y su siguidornan fiel y ciego, no a perde tempo pa fiesta.
Sinembargo no ta bisa kiko MAS Raad van State a publica.
Raad van State a añadi cu e Gobierno di Reino tin e DEBER, a base di su “waarborgfunktie” conforme e Statuut di Reino, pa a actua manera ela actua.
Raad van State ta bisa hopi cla cu, basa riba e "waarborgfunktie" ey, Gobierno di Reino mester a interveni pa evita cu e desaster financiero bira pio y cos sali for di man.
Pasobra si Gobierno di Reino a warda te ora cu e baca hoga, pa e interveni, e ora ey SI nos autonomia lo sufri un daño mucho mas grandi. Pues aki Raad van State ta duna mesora un hustificacion di e actuacion adelanta di e gobierno di Reino.
Den Hulandes tin un dicho ta bisa." De doel heiligt de middelen"!! Y kiko tabata e meta di e KB aki?? Para Mike Eman y su gobierno y e 13 harlekiennan di hiba nos pais na un abismo TOTAL.
UPP aña pasa a duna di conoce di ta contra intervencion di e Gobierno di Reino di e forma cu esaki a tuma lugar.
Nos a declara enfaticamente di ta waak e intervencion aki cu sentimientonan mixto, pasobra apesar di por a comprende e motibonan di Hulanda pa a tuma e decision pa otorga e KB, tambe nos a adverti cu esaki lo tin como consecuencia un minamento di nos Status Aparte y nos autonomia financiero.
Hulanda ta mara na palabracionnan haci den nos Statuut, pero Hulanda semper a, y lo pone su propio interes na prome lugar.
E interes di e Islanan ta bin na di dos lugar.
Mi por duna testimonio di esaki, pasobra durante e periodo cu mi persona tabata tin e honor di a carga responsabilidad gubernamental como minister, minister-president sr. Balkenende personalmente a declara na mi persona cu Raad van State ta duna CONSEHO, pero cu ta e Gobierno di Reino ta esun cu ta carga e responsabilidad politico.
E declaracion aki Balkenende a haci despues di a nenga redondamente pa laga HOF bin establece su mes na Aruba.
E tempo ey Balken(ell)ende a bisa cu POLITIEK DEN HAAG a tuma e decision pa no laga e Hof bin Aruba basa riba articulo 43 inciso 2 (waarborgfunctie) en bez di articulo 38 inciso 2 (samenwerking) di e Statuut di Reino manera Raad van State a conseha e tempo ey.
Y awor un 8 aña despues Gobierno di Reino ta tuma un decision basa riba mesun articulo 43 inciso 2 di nos Statuut, cu Raad van State a bisa cu esey ta HUSTIFICA e decision pa "GRIJP IN " den nos asuntonan interno.
Tin hende tin un memoria hopi cortico y sigur hopi oportunista, pasobra e partido AVP, cu awor aki ta "celebra" e supuesto victoria aki, ta hustamente esun cu e tempo ey a tuma parti pa e Gobierno di Reino, y a apoya e decision di Balkenende.
E marionetanan di AVP nunca por a compronde cu si bo coba un buraco pa otro, na final di cuenta bo mes lo cay aden.
AVP no tin como meta defende e interes di pais Aruba, pero como un partido bende patria nan tin como unico meta cumpli cu e deseo ferviente di nan lider narcisista pa wordo honra door di Hulanda.
Durante e discusionnan cu a tuma lugar na Aruba entre esnan na fabor y esnan contra e otorgamento di e KB, UPP ta e unico partido politico cu a mira y a sinti e necesidad pa defende nos autonomia, no pa medio di mas polarisacion y division, pero pa medio di un intercambio di ideanan di tur partido politico na Aruba den loke nos a yama un “compromiso nacional”.
UPP ta keda insisti cu e unico forma pa evita mas metemento di e Gobierno di Reino den nos asuntonan interno ta pa medio di un Compromiso Nacional, na unda lo palabra reglanan di comportacion conforme e principionan di "Good Governance" pa tur esnan cu ta representa nos digno pueblo sea den parlamento of den gobierno.
|
|
|
|
|
|
|||||
|
|
|
|
|
|
|||||
Den nomber di Union Patriotico Progresista – U.P.P.
Candelario A. S. D. Wever
Brazil, september 20, 2015
Expresionnan haci den e articulo aki no necesariamente ta refleha opinion di ArenaPoliti.co