E 'Private-Public-Partnership Conference' ta planea pa cuminsamento di aña 2016 

ORANJESTAD – Aruba, como parti di Reino Hulandes, a forma parti di un delegacion grandi cu a asisti na varios reunion di importancia pa Reino na Nacionnan Uni na New York. Pero, Aruba riba su mes, a participa den varios reunion, como partner di UNDP (United Nations Development Programme) y miembro di SIDS (Small Islands Developing States).

Den e cuadro ey, Prome Minister Mike Eman, como lider di delegacion di Aruba, a reuni cu Sub Secretario General di Nacionnan Uni, Gyan Chandra Acharya, despues di tabata hunto den un conferencia tocante di e efectonan di desaroyo climatico y lama riba islanan chikito. E reunion entre Prome Minister Eman y Secretario Acharya a trata varios tema, pero un conclusion hopi importante na final tabata cu Nacionnan Uni a scoge Aruba pa ta anfitrion di un conferencia mundial riba PPP (Public Private Partnership) na Aruba. “Nos ta hopi contento cu e hecho cu Aruba ta bay organisa e evento riba PPP aki pa e 'Small Island Developing States' comienso di otro aña,” segun Sr.  Acharya.

Acharya, “Nos ta trata con ta bay promove desaroyo economico di 'Small Islands Developing States' dor di colaboracion entre sector publico, priva, sociedad civil y tambe dor di promove e idea di 'Private Bussiness Network'. No unicamente networking dentro di e pais of small islands developing states, pero tambe networking entre e islanan chikito y inversionistanan potencial hunto cu institutonan internacional.”

“E conferencia aki ta otro aña y nos a discuti cu esaki lo bira un evento importante pa SIDS,” el a expresa.

Cu Aruba a wordo escogi door di Nacionnan Uni pa organisa un evento asina importante ta debi hustamente e storia exitoso di Aruba riba tereno di sostenibilidad, e programa ambicioso estableci, pero tambe loke cu a wordo logra caba. Diferente ehecutivo di e varios programanan di Nacionnan Uni tabatin elogio di loke Aruba, un isla asina chikito, ta haciendo riba su mes.

Hopi palabra di elogio Secretario Acharya  tabatin tambe pa tur loke Aruba ta haciendo pa SIDS. “Nos ta hopi contento cu Aruba ta tumando un rol di lider den asuntonan di energia, awa y desaroyo di turismo den un forma sostenibel. Nos ta hopi impresiona pa e metanan ambicioso cu Aruba a pone pa su mes riba tereno di energia renovabel, pero tambe e iniciativanan cu Aruba a logra uzando e formula PPP (Private Public Partnership). Nos ta spera di por traha riba e sistema aki y logra nos metanan tambe. Esaki ta un bon ehempel di con por implementa un agenda sostenibel na hopi pais.”

E Sub-Secretario di Nacionnan Uni a enfatisa cu loke cu Aruba a haci no ta solamente un ehempel pa SIDSnan, pero pa paisnan grandi tambe. Aruba a demostra con por inclui henter un comunidad den un agenda sostenibel y esaki ta algo cu islanan SIDSnan tambe kier logra. Den cuadro di esaki a papia tambe den e reunion riba Sustainable Development Goals (SDG) pa yega na un maneho sostenibel. Pa logra cumpli cu e metanan poni den e SDG, mester di hopi inversion. Hasta si uza tur e recursonan cu Gobiernonan tin, esaki lo no ta suficiente. E mester wordo haci cu inversionnan priva, manera cu Aruba a haci, Acharya a señala, envolviendo inclusive e comunidad.

Expresionnan haci den e articulo aki no necesariamente ta refleha opinion di ArenaPoliti.co