VISION 2020 

ORANJESTAD- Diabierna cu a pasa tabata dia di sostenibilidad. Pa Aruba un dia hopi special mirando e atencion cu Gabinete Mike Eman Ta duna na e tema aki. Prome Minister di Aruba Eman ta hopi occasion ta invitado special na fora internacional y ultimamente den sala di Nacionnan Uni pa conta di e vision di Aruba pa na 2020 ta independiente di energia fosil. Tambe pa splica kico tur e isla a haci caba riba e tereno aki. Sostenibilidad ta mas cu energia solar, di biento of lama. E ta tambe un maneho social duradero na unda bienestar pa henter e comunidad ta un punto esencial. Mescos tambe un bon maneho ecologico y di ‘food security’ ta parti di sostenibilidad.

Durante un bishita na scol basico Kudawecha unda WEB NV den cooperacion cu gobierno y ELMAR NV a inicia e proyecto grandi instalando panelnan solar riba e scol pa sigui despues pa otro scolnan y edificionan di gobierno, Eman a duna un splicacion cortico tambe riba e maneho cu su gobierno ta trahando riba dje pa Aruba mes produci gran parti di su propio cuminda. “Nos kier bay cultiva nos propio berdura, fruta y demas alimentacion. Tambe haciendo uzo di lama y funda criadero di pesca. Esaki ta haci Aruba sostenibel den un sentido mucho mas amplio, dus social economico, ecologico y loke nan ta yama ‘food security’.

Eman a manda riba e dia di sostenibilidad un palabra di felicitacion na pueblo di Aruba. El a enfatisa cu tur hende por yuda y ta sostenibel riba nan mes door di traha p.e. un plantacion den cura, baha uzo di coriente door di introduci componentenan cu ta percura pa haci e uzo di coriente mas eficiente, pero tambe door di instala molinanan di biento of panelnan solar na cas. “Awe ta un dia importante pa nos fortifica nos compromiso pa haci Aruba totalmente sostenibel na 2020”. Un vision di gobierno y e meta ta pa realise. Prome Minister Eman ta trahando cu alma y cuerpo hunto cu su Gabinete pa logra e meta aki, cu no ta algo cu ta bay sin mas. E caminda ta largo, tin hopi obstaculo na caminda, pero cu e positivismo di gobierno y ayudo di comunidad, ta surpasa cada obstaculo y e meta ta wordo realisa.  Aruba na caminda pa 2020.

Expresionnan haci den e articulo aki no necesariamente ta refleha opinion di ArenaPoliti.co