PRESUPUESTO 2016 NO A YEGA PARLAMENTO AINDA, GOBIERNO TA LAAT ATROBE!  

Segun nos Constitucion, gobierno di Aruba tin cu entrega presupuesto di pais Aruba pa e siguente anja, no mas tarda cu dia 1 di september.

Esaki ta un punto cu e e gobierno di signatura berde tempo nan tabata den oposicion semper a cuestiona si gobierno, e tempo aya di MEP, tabata entrega e presupuesto na tempo. Sinembargo awor cu nan ta den gobernacion nan mes no ta entrega e presupuesto segun ley ningun biaha.

Envez di entrega Parlamento presupuesto y plan di maneho di gobierno pa otro anja, gobierno ta organisando conferencianan den diferente sector, gastando bastante placa. MEP en principio no ta contra conferencia sino ta di opinion cu un conferencia mester tin un meta y no mester ta djies pa show! E impression cu pueblo di Aruba ta hayando actualmente ta cu e diferente ministernan ta organisa Conferencianan manera pa competi ken por organisa mas bunita, ken por hasi mas show, of pa asina nan por sinja pa por haci nan trabao. MEP ta di opinion cu envez di inverti placa di nos pueblo pagador di belasting den organisa magno conferencianan cu oradornan famoso, gobierno mester cuminsa inverti den haci e trabao y den e trahadornan pa equipa nan suficiente cu material pa por haci nan trabao riba un manera professional y responsable. Esey pueblo ta spera di gobernantenan.

MEP ta menciona como ehempel e Conferencia di energia berde sin te ainda tuma stap concreto pa baha prijs di awa y coriente. Es mas, a hisa e prijs! Mescos ta conta cu e conferencianan cu lo ser organisa pa loke ta trata abuso di mucha y negligencia. Aki tin cu remarca cu tin diferente rapport publica den pasado y hasta dor di un comision cu e gobierno a lanta y cu tur hende sa kico ta puntonan di atencion pero kizas pa miedo di actua of pa falta di conocemento e minister concerni awor kier organisa un conferencia pa e yega na mesun conclusionnan cu ya caba tin .

Pueblo por spera cu djies na ultimo momento lo drenta dicho presupuesto cu e presion pa Parlamento haya tempo limita pa studia nan y pa aproba nan. Esaki lo ta un biaha mas un falta di respet pa e organo di mas halto di pais Aruba y ta spera cu Presidente di Parlamento para firme y no permiti cu gobierno ta dicidi pa Parlamento.

Expresionnan haci den e articulo aki no necesariamente ta refleha opinion di ArenaPoliti.co