For di hopi tempo caba UPP tabata mustra riba un maneho anti-clase trahador y anti-Arubiano, di e gobierno derechista y neo-liberal di AVP, cu aprobacion y consentimento di tanto gremio comercial, como pa colmo tambe di varios sindicatonan.
Na comienso di e aña aki ya caba UPP a denuncia e declaracion di Paul Croes riba flexibilisacion di nos Mercado laboral, pero manera a bira custumber, ningun hende no a worry cu e advertencia aki.
Kiko flexibilisacion ta encera?
Kiko ta e consecuencia si e gobierno neo-liberal y anti trahador haya su gana y logra flexibilisa e mercado laboral?

Hopi tabata e lucha, tin biaha hasta sangriente, cu mester a ser hiba pa e trahador por a haya e proteccion necesario contra abusonan cu tabata ser cometi contra e clase trahador.
Un di e abusonan tabata cu e doño di trabow por a kita e obrero for di trabow e ora cu e haya e gana di kita esaki (Hire & Fire).
E obrero no tabata conoce ningun tipo di proteccion. Ta despues di hopi lucha a logra cu un obrero - despues cu e pasa un periodo di prueba, cu na Aruba ta dos luna - no por ser kita sin ningun motibo.
Cu esaki e obrero a haña e siguridad di trabow, y consecuentemente e oportunidad di por a crece den un compania, y e oportunidad pa por traha riba un futuro pa su mes y pa su famia.
E compania na su turno hopi biaha ta inverti den e obreronan aki pa nan por mehora nan prestacion den e compania.
Pues un situacion di "win win", tanto pa e obrero como pa e compania.
Hunto cu e derecho aki nos ta haya tambe e asina yama "proeftijd" cu e obrero tin pa e por haya un trabow fijo, y e proteccion manera ariba ilustra.
Awor nos ta ripara cu e minister actual di Labor kier kita tur dos derechonan fundamental aki di e clase trahador.

E discusion di flexibilisacion di e mercado laboral a inicia un paar di aña pasa, ora cu e economia mundial a cay den un spiral negativo.
Sinembargo estudionan haci door di organisacionnan imparcial a demostra cu flexibilisacion lo ta hopi negativo pa e obrero y pa e compania, pasobra e.o. nan lo no ofrece oportunidadnan pa up-grading di e obrero.
Esaki lo tin como consecuencia cu e productividad lo baha, y e necesidad pa innovacion lo no t’ey tampoco mas, pasobra e obrero lo no tin un "binding" cu e compania.
Un obrero cu proteccion lo produci mas y ta dispuesto pa pensa con e lo por bin cu solucionnan innovativo pa e compania.

UPP no por compronde con un gobierno cu ta gaba di a reduci desempleo, y cu ta duna permiso pa importa trahador di afo, ainda ta haña ta necesario pa impone mas medida contra e clase trahador den un economia, cu segun nan, ta mustra un crecemento continuo y ta florece?
Of tin otro motibonan?
Si ta asina, anto lo gobierno mester ta mas honesto y transparente. Probablemente por tin solucionnan sin cu mester bay over na kita derechonan di e trahador.

UPP ya den diferente articulo a adverti cu eliminacion di e "proeftijd" di dos luna den combinacion cu e flexibilisacion di e mercado laboral, e "open- door-policy", y e hecho cu e trahador di pafo ya despues di apenas 3 aña no mester bay DPO, lo haci e posicion di e trahador Arubiano den nos Mercado laboral sumamente precario.
Y pa colmo de los colmos ta introduci e maneho na unda e Hulandes Europeo NO mester bay Job Centre mas. E mester simpelmente mustra cu e tin un trabow y un lugar pa e biba, y e ta haya FIRMA LIBER from day one. E cambio di maneho aki ta nifica cu - conforme e "Vriendschapsverdrag" - un Mericano ta haña e mesun derecho cu e Hulandes Europeo. E consecuencia directo di esaki lo ta cu nos lo bay haya un Esclavitud Moderno aki na Aruba, y cu pa nos yiunan di tera, particularmente nos hobennan, lo bira sumamente dificil pa haya trabow.

Dia 4 di augustus un biaha mas nos a adverti riba e tendencia aki, na unda no solamente Paul Croes a enfatisa cu lo bin cu e cambionan aki, pero tambe sr. Hepple di AHATA a confirma e declaracion di e minister.
Mas tristo ta cu e ex-sindicalista Anselmo Pontilius diripiente a bin ta declara cu ta necesario pa periodicamente evalua cierto ley cu ta regarda e derechonan di e clase trahador.
Mira con pensamentonan di hende por cambia, djis pa un posicion: "HET KAN VERKEREN"!!

Den curso di siman pasa porfin e gremio sindical a cuminza reacciona contra loke pa hopi tempo caba UPP tabata adverti p'e. Y awor ta haci un yamada pa partidonan politico no mete den e polemica aki.
Mi ta contento cu cierto sindicalistanan a lanta for di soño, pero nan tin e pudor di awor bin exigi pa partidonan politico no involucra nan mes den e discusion.
Ta esey ta e democracia cu nan, mescos cu gobierno, kier predica?
No ban lubida cu ta mayoria di e sindicatonan tabata wine & dine cu e gobierno den e "Dialogo A-Social", na unda a bay di acuerdo pa suta e pueblo cu medidanan, y cu tin nos pueblo y e clase trahador sufriendo.

Nos di UPP no solamente ta contra eliminacion di e derechonan aki, pero nos ta urgi sindicatonan, principalmente esnan cu ta representa e trahadornan publico, pa hiba un lucha pa e trahadornan den sector publico cu ta "arbeidscontractanten" y cu NO tin ningun clase di proteccion.
Ni e prima di pensioen general gobierno ta paga pa nan.
UPP, como un partido social democrata, lo keda sali na vanguardia di e pueblo Arubano. Nos lo sigui e lucha contra e abusonan cu a ser haci contra e clase trahador door di e gobierno di AVP, cu consentimento di sindicatonan, desde november 2009 . Nos ta sumamento satisfecho cu porfin e sindicatonan aki a duna oido na nos advertencianan, y cu nan porfin kier join den e lucha contra e gobierno anti-Arubiano, anti-Clase-Trahador y Neo-liberal.
A yega e momento pa para e rumbo desastroso cu nos ta bayendo, y mirando cu den Parlamento nos no por spera cu lo para e cambionan di ley aki, no ta keda ningun otro caminda pa haci esaki, cu ta paralisa Aruba.
NO tin lucha sin sacrificio.
E obrero a sacrifica hopi caba, y awor kier kita derechonan legal tambe?
E gobierno aki en berdad a gana eleccion, pero nos ta convenci cu nan no tin e legitimidad real mas pa sigui goberna, y cu ta den un union so nos por logra pa para e rumbo cu nos pais ta bayendo.
Nan tin directornan di departamento cu ta papia nan idioma, prensa comprometi cu ta sigui manipula, gremio comercial cu ta harlekin di e neo-liberalnan aki, y e 13 marionetanan den parlamento cu lo apoya e gobierno aki ciegamente, pues e tempo di dialoga a pasa; ta solamente à la carahaso mester bay, y ta di spera cu e sindicalistanan saca e vocabulario fuerte di 2007-2008 y 2009 for di lachi, y cuminsa grita fuerte atrobe: "BAHA  AWOR,  OF  OVER  MY  DEAD  BODY"!!

Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, october 26, 2015

Expresionnan haci den e articulo aki no necesariamente ta refleha opinion di ArenaPoliti.co