Den cuadro di celebracion di 30 aña di nos status aparte y 40 aña di nos Himno y Bandera, pero tambe 60 aña di nos Escudo, tin hopi trabounan andando pa por celebra esaki manera debe ser. Den e siman tras di lomba a firma e "gunnings advies", cual e contratista Van Kessel ta encarga pa construccion y e trabounan riba Plaza Padu. Un inversion di mas of menos 1.6 miyon florin cu ta encera henter e aspecto infrastructural y e artista Ciro Abath lo ta esun encarga cu e proyecto pa rindi honor na e tres compositornan di nos Himno cu otro aña lo ta celebrando 40 aña di existencia. Ta trata di un obra di arte cu ta ilustra e propio Padu Lampe, conhuntamente cu su dos amigonan y co compositornan di nos Himno Nacional, Rufo Wever y Hubert Lio Booi. Di e forma aki ta duna tambe reconocimento na e tres baluartenan aki cu ta graba den historia di Aruba. Minister Otmar Oduber ta comenta cu e trabounan aki mester culmina prome cu 18 di maart pa e gran celebracion por tuma luga riba Plaza Padu tambe.

Un otro proyecto cu tambe mester completa prome cu e fecha menciona ta e trabounan na Plaza Betico Croes. Minister Oduber ta bisa: "Nos a tuma decision conhuntamente cu Departamento di Cultura, cu ayudo financiero di Oficina di Turismo y tambe Fondo Desaroyo Arubano cu a traves di UNOCA a mira e importancia pa un otro herencia cultural cual ta Plaza Betico cu casi despues di 30 aña no a ricibi un mantencion debido, cu lo inverti rond di 1 miyon Florin pa mehoracion di e plaza. Hopi ta esnan cu por a nota e condicionnan bastante fastioso cu e plaza aki ta den dje, unda awor cu e inversion, pa e proximo celebracion dia 17 di maart, lo por tin por lo menos un miho plaza." Lo mehora e area di e koepel unda henter e aspecto infrastructural di esaki lo ta bek den condicion, y cambio completo den electricidad. Tambe e koepel lo conoce un expansion y lo drecha e area bou di stage y tambe e espacio unda e artistanan ta haci uzo durante nan presentacion lo conoce mehoracion den infrastructura. Sr. Oduber ta sigui comenta: "Cu e mehoracion di Plaza Betico awor lo por tin un espacio disponibel, cu henter aña por wordo poni na disposicion di nos comunidad. Banda di e actividadnan cu nos tin custumber di dje awor tin espacio pa entrenamento di baile, teatro of musica kisas. Banda di e plaza mes cu mehoracion di e koepel completo tin mas espacio pa sigui desaroya no cultura." E mandatario a comenta cu a acerca Cas di Cultura pa por yega na un asina yama "beheersovereenkomst", pa di e forma aki Cas di Cultura por keda encarga cu maneho di Plaza Betico. Percura pa maneho diario, huur y uzo di e plaza den un forma continuo. Minister Oduber ta finalisa bisando: "Nos kier pa durante henter aña tin actividad pa di e forma aki por mantene Plaza Betico den su top condicion y pa e no bay for di man manera a pasa den pasado unda awe mester haci un inversion asina grandi."

Expresionnan haci den e articulo aki no necesariamente ta refleha opinion di ArenaPoliti.co