ORANJESTAD – Green Aruba Conference 2015 no por a cuminsa di miho forma. Participantenan den ballroom di Marriott a presencia un mensahe cu  President di Merca, Bill Clinton a prepara specialmente pa e evento aki. E lider mundial y defensor di practicanan sostenibel, a expresa con e ta lamenta di no por ta presente personalmente y gradici Prome Minister Mike Eman, Gobierno di Aruba, Utilities N.V., WEB Aruba N.V. y N.V. Elmar pa haci e evento posibel. Den su mensahe, e humanitario a pone enfasis riba e hecho cu energia renobabel ta e direccion corecto protehando mundo y fomentando economia; e ta compromete tambe e ayudo di su fundacion y ta di opinion cu Aruba y e region di Caribe ta ehempel pa mundo sigui.

“E reto y oportunidadnan cu boso ta discutiendo ta cerca di mi curason y mi ta elogia tur lider den audiencia pasobra ta sigui acepta energia renobabel, demostrando cu cambio ta posibel,” asina Clinton ta bisa den su mensahe. E ta indica cu ya caba isla y comunidadnan costero ta sufriendo e consecuencianan di cambio climatico, pero e vision y practicanan enfoca riba energia renobabel y eficiencia di energia, no solamente ta pone e paisnan busca un futuro mas limpi, pero tambe ta crea trabou. “Boso ta mas cu djis e front line di cambio climatico; boso ta tambe e vanguardia di nos reaccion global. Esaki ta no solamente e miho manera pa avansa, pero tambe e manera di mas sabi y economico pa bay dilanti.”

Pa Clinton ta increibel cu ainda nacionnan Caribense ta gasta 15% di nan Producto Domestico Bruto den genera coriente pa medio di kima fuel. “Boso tin abundancia na recursonan natural y danki na e costo di tecnologia pa energia renobabel cu ta birando mas barata, mas eficiente y mas facil pa integra, energia limpi y barata por alivia e peso financiero di paisnan, mescos cu di famianan permitiendo mas crecemento y prosperidad.” E ta sinti’e honra di por yuda alcansa visionnan y contento cu awo, pa medio di e sociedad cu Rocky Mountain Institute y Carbon War Room, por yuda mas pais ainda.

“Pais y comunidadnan rond mundo mester ta impresiona pa e liderazgo di islanan cu ta trahando pa un futuro mas sostenibel y fuerte,” Clinton a expresa. Na su opinion, cada proyecto exitoso cu nos implementa ta bira e plan pa otro luganan tambe haci y demostra cu un futuro di energia renobabel ta posibel, no solamente den Caribe, pero na henter mundo.

Por ultimo, e President Mericano a papia directamente cu e participantenan di e di seis edicion di e conferencia bisando: “Mi ta urgi boso pa construi riba e relacionnan nobo cu boso a cera den Green Aruba, pa wanta un dialogo habri y encurasha y adopta practicanan di energia sostenibel no solamente den e interes di proteha e islanan aki cu boso ta yama cas, pero pa sigura cu nos ta laga e Tera aki den un condicion cu futuro generacionnan tambe por prospera cune. Sigui cu e bon trabou!”

Expresionnan haci den e articulo aki no necesariamente ta refleha opinion di ArenaPoliti.co