Aruba Mural Projects ta un concepto di arte publico cu e intencion pa amplia accesibilidad di arte y cultura na henter nos comunidad y bishitantenan pero AMP a resulta di ta mas cu simplemente arte riba e murayanan na San Nicolas. Un proyecto cu a inicia 5 pa 6 luna pasa y ta un proyecto cu lo continua di desaroya. Un iniciativa di Ministerio di Cultura cu colaboracion di Departamento di Cultura y sosten financiero di UNOCA y AAA.
AMP demostra di a contribui a traves di arte na bienestar social cu e proyecto di Old Barber Shop. AMP a cambia e imagen di un Old Barber Shop bandona, pa un aire fresco un edificio completamente biña den un area mas limpi. Esaki ta e cambio y colaboracion cu lo kier pa continua den e area aki. A sigui cu inauguracion di e prome 5 muraya di cual ta spera di por inspira mas di tipo di proyectonan aki amplificando San Nicolas.
Glenda Heyliger, Nigel Matthew Armando Goedgedrag y Rudyomar Leysner ta e prome 4 artistanan cu a forma parti di AMP cual cu a resulta di un fusion di diferente generacion trahando hunto y traspasa experiencia y talento pa nos futuro generacion. Cada un muraya cu su nificacion, cada un artista a crea un obra cu su propio inspiracion di San Nicolas.
Nigel Matthew su muraya ta ilustra fiesta. E ta mustra fiestanan nacional y nos cultura. Aruba ta multicultural esaki a keda identifica pa cada mucha den e pintura cu nan caracteristicanan di cada un nacionalidad cu awendia ta incorpora den nos comunidad.
Armando Goedgedrag ta contento di a forma parti di AMP y por tabata un di e prome artistanan pa colabora. E ta splica cu su obra ta un concepto di Sunrise City. Motibo exacto pa escogencia di e colornan di e obra unda ta crea e efecto di ora solo sali pariba di nos isla. Pa identifica San Nicolas un poco mas fuerte a scoge icononan infrastructural manera ta e anker cora na colony, Misa Santa Teresita, Charlies Bar y sin laga afo e Watertoren.
Glenda Heyliger ta un artista cu un estilo contemporaneo. E pintura ta ilustra Aruba unda banda robez ta Oranjestad cu su corona pero cu tur diferente elementonan cu ta forma Aruba. E piedra banda drechi ta forma San Nicolas, y sin San Nicolas Aruba no ta completo. Si kita e pida baranca aki tur cos ta cai foi otro. Intencion ta pa Glenda continua cu un serie di pintura pa conta e importancia di San Nicolas pa nos isla.
Rudyomar Leysner kier a enfoca riba e historia di nos naturalesa uzando e mata di Brasil. Aruba tabata exporta e mata aki asina hopi cu awendia no tin mucho mas di e mata aki riba nos isla. A scoge un camara estilo polaroid pa conecta e pasado cu e presente. Riba e potretnan por nota hopi monumento y edificionan conoci por ehempel e hospital di Lago y Lighthouse di Seroe Colorado den su tempo. Pa Rudyomar tabata un experiencia bunita di por a traha cu e hobennan y inspira nan pa sigui den e mundo di arte. E muraya mey mey ta haci un accento riba e vision di haci di San Nicolas e enfoke di cultura skirbi "WEKULCHA" un dicho cu lo identifica San Nicolas. Manera ta conoci e proyecto di Aruba Mural Projects ta un proyecto cu lo continua y e dicho di Wekulcha lo resona hopi mas. E interes a crece entre mas artista local cu ta cla pa forma parti di AMP. Ya caba por nota hopi di esnan cu ta sacando "selfies" na e murayanan. E ta un promocion grandi riba su mes caba pa nos isla internacionalmente via rednan social y sin menciona un sentimento unico pa e artistanan cu a colabora.

Expresionnan haci den e articulo aki no necesariamente ta refleha opinion di ArenaPoliti.co