Den un entrevista telefonico lider di MEP sra. Evelyn Wever-Croes a elabora riba conferencia di COPPPAL na Santo Domingo. Parlamentario Wever-Croes a declara lo siguiente: Awe a cuminsa na Santo Domingo e conferencia permanente di partidonan politico COPPPAL. COPPPAL ta un organisacion cu ta representa partidonan politico cu ideologia sociaal democrata manera ta e caso cu partido MEP. Sr. Rudy Croes y mi persona tambe ta invita na e conferencia aki y ami lo hiba palabra. Mi persona a wordo pidi pa hiba un discurso enfokando riba autonomia di Aruba. No ta un secreto cu desde 1986 pa awe nos a perde parti di nos autonomia vooral e ultimo anjanan bou mando di Gabinete Eman cu cu mal maneho financiero.

E ta un hecho cu paisnan cu tawata kolonisador a yega na palabracionan cu Nacionan Uni cu nan mester duna nan ex kolonianan mas sosten y espacio pa nan por para riba nan propio pia. Sinembargo den caso di Aruba e gobierno door di su mal gobernacion a perde autonomia financiero y Hulanda ta coresponsabel den esaki y cu esaki nan ta hasiendo nan mes culpabel pa viola e palabracionan hasi na Nacionan Uni. Esaki ta algo cu nos a denuncia caba na Nacionan Uni.

Como partido cu a lucha pa un status aparte conhuntamente cu COPPPAL nos lo sigui cana e caminda pa e denuncia. Normalmente ta gobierno ta e prome jama pa lucha pa su pueblo por dicidi riba su mes pero Gabinete Eman ta papia hopi y hasi poco. Nan tin mas cu un anja ta pleita den medionan di comunicacion y via carta pero ora di topa otro nan ta brasa, smelt y doblega pa otro.

Nos ta convenci cu ta e autonomia di Aruba a trece tanto bienestar bek desde 1986 cu nos a haya nos Status Aparte y nos no kier perde. No ta husto cu nos a perde nos autonomia financiero na man di un gobierno sin vision manera esun di Mike Eman. Si nos mustra mundo henter cu nos por maneha nos pais na un forma responsabel y pone orden den e desorden financiero, ningun pais no por mete den nos asuntonan mas, ni Hulanda. Hustamente pa esaki nos a bin busca e sosten serca COPPPAL. MEP a wordo hopi bon ricibi y mi ta sintimi hopi orguyoso di por ta representa MEP y Aruba den e conferencia aki, tawata palabranan di lider di MEP sra. Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co