Si tin un politico cu a gana e premio mayor den mentira y manipulacion, esey ta e lider di fraccion di AVP, Rene Herde. Di tur forma y birando tur skina Rene Herde kier sigui defende su gobierno corupto y abusado. Siman pasa el a bin cu un otro storia yena cu manipulacion, esta cu Aruba lo a baha dos biaha mas hopi na deficit den un aña cu paisnan grandi a haci den cinco aña. Ta increibel con Rene Herde kier compara un pais chikito manera Aruba cu ta depende di un solo pilar economico cu paisnan grandi cu ta basa nan economia riba un sin fin di pilar economico. Alavez el a trece padilanti cu Francia a tuma cinco aña pa baha su deficit di 7% pa 3.5% y cu Hulanda a tuma cinco aña pa baha su deficit di 5% pa 2%.

Aumento di deficit
Sinembargo den su forma acostumbra di trata di manipula mente di pueblo, Rene Herde no ta conta pueblo cu a tuma e mesun cinco aña aki cu e ta papia di dje pa su gobierno abusado aumenta y casi triplifica e deficit financiero di 3.6 % na 2009 (Gabinete Oduber) te na un record mundial di 9.3% na 2014 (Gabinete Eman); mira tabel adhunto. Consecuencia directo di e deficitnan astronomico aki ta cu nos debenan nacional tambe a crece den forma explosivo durante e cinco añanan aki, esta for di 2230 miyon florin na 2009 te cu 3871 miyon florin na 2014. Pues un crecemento gigantesco di 1641 miyon den apenas 5 aña di tempo. Un “logro” cu Rene Herde siguramente no por ta orguyoso di dje!

Hiba awa lama
Awor si bo a kere cu e reduccion di e deficit for di 9.3% te cu 3.7% den un solo aña cu Rene Herde ta broma cun’e lo conduci na reduccion drastico di nos debenan nacional, anto bo ta keda grandemente ekiboca.  Hecho ta cu durante e siguiente 4 añanan (2015-2018), nos debenan nacional lo sigui crece: 4013 miyon na 2015, 4165 miyon na 2016, 4231 miyon na 2017 y 4252 miyon na 2018. Y esaki sin conta e debenan biyonario di e proyectonan PPP. Pues ki bal cu den forma ficticio supuestamente bo a baha e deficit financiero, pero di otro banda bo debenan nacional ta sigui crece cada aña mas y mas. Pues e afamado practica di hiba awa lama!

Inversion y aumento di debe
Alavez den su ultimo comunicado Rene Herde kier hustifica e aumento drastico di e deficit di 9.3% na 2014, bisando cu esaki ta debi na e 170 miyon florin cu gobierno lo a inverti (?) den e fondo di APFA p’asina cubri e grado di cobertura di e fondo. Pero den e mesun rosea Rene Herde no ta splica pueblo cu gobierno mes no tabatin e suma di 170 miyon florin aki pa inverti, pero cu gobierno di AVP cu un man a fia e suma aki for di APFA y cu e otro man el a hinca esaki bek den e fondo di APFA. Finalmente tur hende mester por comprende cu Gabinete Eman cu e triki aki a sigui aumenta nos debe nacional cu 170 miyon florin extra y cual aumento por ser mira tambe den e crecemento drastico di nos debe nacional na 2014.

Por ultimo, lo ta bon pa den fraccion di AVP nan busca un miembro cu lo por papia y splica cu argumentonan concreto henter e situacion financiero di Aruba, ya cu cada biaha ta resulta cu Rene Herde no tin conocemento di e parti di finanzas publico y constantemente ta papia barbaridadnan cu e mes no ta comprende.

Expresionnan haci den e articulo aki no necesariamente ta refleha opinion di ArenaPoliti.co