Oranjestad: Parlamentario, sr. Guillfred Besaril a reacciona riba e recien declaracionan di director di Arubus, señor Theo Croes, caminda e ta declara cu e ley di parkeer no ta specifica cu exactitud cierto caminda cu AruParking por cobra pa Parkeer. Pues AruParking por lo pronto lo no ta cobra eynan pa parkeer, te ora cu en todo caso bin mas claridad riba e interpretacion di e ley. Parlamentario Besaril a declara lo siguiente:

"E forma desastroso con e Gobierno di AVP a introduci e Ley di Parkeer, ta un falta di respet enorme pa tanto Pueblo como comercio en general di Aruba! Comerciantenan di Caya Betico Croes y vecindario mester a soporta mas di 3 aña di perdida dor di construccion den e caya principal di Oranjestad. Despues di e introduccion di e ley di parkeer, mayoria comerciante a trece padilanti cu nan benta a bolbe cay. E biaha aki cu un promedio di entre 30 pa 60%!

Ademas cu e ley aki a wordo introduci con cu ta, e problema di mas grandi ta e implementacion y control di e ley. A lanta un NV, train algun persona pa algun siman y pone nan encarga cu e implementacion y control di parkeer den centro di ciudad. Tur esaki sin cu nan tin un conocemento adecuado di ley". Segun Besaril, e plan presenta 3 aña pasa dor di e mes un Gobierno aki pa soluciona e problematica di parkeer den Oranjestad, tabata ensera cu polisnan cu termina e opleiding MBO-2  (y cu lo atende scol di Polis pa minimo 1 aña), lo a atende cu e problemtatica en cuestion. Ademas di esaki, lo atende cu orden publico y e aspecto di prevencion banda di high rise hotels.

"Lamentablemente Gobierno a cambia di plan y na su luga a lanta un NV. A laga train e  personal pa algun siman so y a pone nan traha ganando porcierto pa personal sigur 800 pa 900 florin mas pa luna, cu e salario cu un agente policial cu a atende e opleiding pa 1 aña ta ganando! Ta un hilaridad di pensa cu un persona cu a ricibi un training di apenas algun siman, por tin e conocemento di ley adecuado pa implementa e ley di parkeermeter manera cu esaki a keda introduci. Un ley cu ta bastante complica mirando cu e ta regarda y ta touch varios otro ley, caminda cu no ta AruParking sino Cuerpo Policial ta esun yama na tuma cierto accionan.

Un biaha mas tin cu constata un Gobierno pata pata di plan, pero cu un falta di vision enorme pa ehecuta esakinan como debe ser.  Nada straño cu awe nos ta deal cu un implementacion desastroso di e ley aki. Aruba tin na e momentonan aki un Gobierno cu tin yen di plan bunita pa show cune, pero ata otro prueba mas di nan capacidad pa ehecuta! Ta tristo cu ni na momento di realisa cuanto daño e implementacion di un ley manera esun di parkeermeter ta hasi na e comunidad en general, no ta demostra grandesa politico pa hasi algo positivo. Esaki ta e unico realidad di e ultimo 6 aña di gobernacion di partido AVP, pa tristo cu esaki por ta". Parlamentario Besaril a termina.

Expresionnan haci den e articulo aki no necesariamente ta refleha opinion di ArenaPoliti.co