Lider di MEP, Evelyn Wever-Croes: Diahuebs 26 november, 29 aña di fayecimento di Betico Croes [+audio]
STA CRUZ -- Diahuebs awor, 26 di november, ta cumpli 29 aña di fayecimento di nos Libertador Betico Croes.
"Ami tabata studiando na Hulanda, y mi tabata comparti un apartamento cu Glenbert, mi primo. A toca ami pa contesta e telefon e diaranson mainta trempan ey y pa pasa e noticia pa Glenbert cu su tata a fayece. Nos tabata sa cu Betico tabata malo, pero e diadomingo prome nos a lagu’e trankil den su camber di hospital na Utrecht. Pues e noticia a cay hopi duro. Nos Libertador a fayece. El'a construi e cas di Status Aparte pa nos biba aden cu nos yiunan, el'a entrega nos e yabi, pero e mes no por a gosa di e libertad cu tanto el'a lucha p'e. Indudablemente cada un di nos ta corda e momento cu bo a wordo informa di fayecimento di Betico, y indudablemente abo ta corda unda bo tabata na e momento ey. Un hecho cu a marca bida di hopi hende, aki na Aruba pero tambe den exterior.
Ta pesey cada aña di nobo ta hopi ta esnan cu ta para keto riba e fecha aki pa reflexiona riba e bida di e gran estadista aki, con el'a lucha pa nos y kico tur el'a logra pa nos. Y esey ta yena nos cu mas determinacion pa sigui lucha pa nos gana nos autonomia bek.
Partido MEP ta invita bo pa conmemora hunto cu nos e fecha di aniversario di fayecimento di nos Libertador Betico Croes, diahuebs awor, 26 di november. 6’or di atardi lo tin ponemento di krans na Santana na Santa Cruz y 7’or di anochi tin un Santo Sacrificio di Misa na Misa na Santa Cruz.
Expresionnan haci den e articulo aki no necesariamente ta refleha opinion di ArenaPoliti.co