Ministerio di Cultura: Minister Otmar Oduber cu atencion special pa nos monumentonan
No ta un secreto cu Minister Otmar Oduber ta dunando hopi atencion na salvaguardia nos monumentonan como parti di su maneho integral di cultura.
E parti di salvaguardia, mantene y renova un edificio cu ta wordo considera monumento semper a mustra di ta complica y sin un liña di maneho fiho. A yega te na e punto cu hasta mundo di construccion mes su deseo pa traha riba e tipo di edificacionnan aki a baha considerablemente, hopi biaha debi na e falta di transparencia cu ta necesario pa renovacion y mantencion di monumentonan.
Pa yega na un solucion na e situacion aki y tin liñanan di maneho, Minister Oduber a tuma e decision di acerca un compania di Corsow, Newton Heritage Consulting atraves di Oficina di Monumento pa traha cu nos instancianan local riba un manual pa maneho di monumentonan.
Den e manual lo stipula tur regla cu mester atene na dje y e exigencianan cu por bin for di Oficina di Monumento ora ta trata di un edificio cu ta wordo considera como monumento. E reglanan aki lo ta standariza y lo ofrece e transparencia necesario pa loke ta trata renovacion, restauracion y mantencion di monumentonan.
Intencion ta pa bin cu metodonan internacional cu por reduci e gasto di renovacion, mantencion y/of restauracion di monumentonan. Minister ta premira cu e gastonan aki lo por wordo reduci cu aproximadamente 20%.
E siman aki Newton Heritage Consulting y Oficina di Monumento lo ta reuniendo cu e diferente stakeholders pa duna e informacion necesario tocante e proyecto aki cu lo mester conduci na un mihor cuido, atencion y mantencion di nos monumentonan.
Expresionnan haci den e articulo aki no necesariamente ta refleha opinion di ArenaPoliti.co