Fin di aña 2015 ta den porta y ainda Parlamento di Aruba no a recibi di Gabinete Eman e presupuesto pa 2016. E tradansa aki combina cu e comentario di e colegio di supervicion CFT ta bolbe crea incertidumbre grandi den Pueblo y den comercio. Atrobe nos ta bay habri un aña nobo sin cu nos sa kiko ta e intencion di e gobernacion di nos Pais y mas importante sin cu nos sa ta cual medidanan Gabinete Eman lo bay pasa pa drecha e desaster financiero cu nan a ocaciona na nos Pais.

Otro KB por ta na caminda
Minister Eman a firma Protocol na mei 2015 y despues e fraccion di AVP a pasa e ley pa Aruba bay bou di supervicion di CFT pa evita cu Hulanda mester a impone e supervicion. Cu esaki AVP a bay de acuerdo pa promer cu 15 di december tin un presupuesto aproba pa Parlamento pa e proximo aña. Pero faltando dos siman pa e deadline aki nos ta constata cu presupuesto 2016 no a ni yega Parlamento, corda pa e wordo trata y aproba. Keda sin cumpli cu e Ley di CFT ta trece cune cu Conseho di Minister di Reino por manda un KB atrobe pa Gabinete Eman y cu tur e drama di 2014 por bolbe ripiti na nos Pais.

Mas incertidumbre den Pueblo y comercio
Como cu Gabinete Eman a priminti CFT cu nan lo bay pasa un lista di medida pa drecha e finanzas publico di nos Pais y cu Minister Eman a pone un klem pa Minister Bermudez no papia nada riba e medidanan proponi den e reforma fiscal, Pueblo y comercio ta biba den e incertidumbre di no sa ki gasto extra nan mester bay tene cuenta cune ora cu aña bolter.

Minister Presidente mester goberna na serio of bay su cas
Mester remarca cu e ta un berguensa cu nos como Pais mester pasa den asina tanto incertidumbre aña tras di aña djies pa e hecho cu nos Minister President Eman no kier asumi su responsabilidad pa goberna drechi na bienestar di nos Pueblo. Ta su mal gobernacion, su falta di tuma decicion, su ausencia cada ves ta locual ta trece tanto incertidumbre cu ta perhudica nos Pueblo y e comercio na Aruba. For di un Minister President di un Pais, nos por a spera un gobernacion mas na serio. Pero como cu Minister Eman na tanto ocacion a mustra cu e no por goberna e Pais aki na drechi, ta yega ora pa e tuma tiki honor na su mes y bay su cas pa asina normalidad por bin bek den gobernacion di e Pais aki.

3 december 2015

Expresionnan haci den e articulo aki no necesariamente ta refleha opinion di ArenaPoliti.co