ORANJESTAD -- Parlamento dialuna a trata un ley tocante Verzorgingshuizen, esta casnan di cuido di nos grandinan. Minister Schwengle kier pasa un ley macro pero falta tur e detayes ainda pa yena.
Pa fraccion di MEP esey ta un problema, pasobra una bes Parlamento aproba e ley macro, ta Minister so tin e ultimo palabra den duna contenido na e ley. Segun e ley cu minister a presenta na Parlamento, e contenido di e ley mes lo wordo regla den 13 otro decreto, manera landsbesluit y ministeriele regeling. Parlamento lo no tin nada di bisa mas.
Normalmente esaki lo no ta un problema, segun Evelyn Wever-Croes, pasobra e minister ta esun finalmente responsabel pa e maneho di nos grandinan, esun "eindverantwoordelijke", pero ta hustamente e minister aki constantemente ta nenga di carga e eindverantwoordelijkheid ey. Constantemente e minister ta  busca pa culpa otro, manera den caso di e proyecto di Hopital, den e falta di Operatiekamer, etc. Nunca e minister kier carga e responsabilidad, y pesey nos no por confie cu e ley marco aki tampoco segun lider di MEP den e prome tanda di e reunion.
Pero no ta esey ta e unico problema den e caso aki.
"Den preparacion pa e reunion aki nos a reuni cu varios instancia cu ta cuida nos grandinan y nan ta hopi preocupa pa e ley aki, principalmente pasobra nan no sa te con leew e ley aki lo bai, y principalmente pasobra nan no tin placa pa cumpli cu e ley aki.
Pesey nos a pidi pa pospone e reunion aki, pa asina scucha nan. Pasobra cu Gobierno ta sera porta pa nan ta un cos, pero cu Parlamento tambe ta hasi esey si ta inaceptable. Lamentablemente presidente di Parlamento riba insistencia di e 13 parlamentarionan di AVP a scohe pa NO pospone e reunion, pasobra nan ta cla pa vota VOOR caba. Lamentablemente asina Parlamento tambe a bira lomba pa pueblo.
Mi ta hopi preocupa pa e repercusionnan di e ley aki, y especialmente si e no ta wordo carga bou di esnan cu mester bai traha cun'e. Pero lamentablemente nos ta den minoria, y tanten cu e mayoria di AVP no ta interesa den e berdad, nos no por cambia esaki", palabranan di lider di MEP Evelyn Wever-Croes

Expresionnan haci den e articulo aki no necesariamente ta refleha opinion di ArenaPoliti.co