Apenas algun siman prome cu fin di aña, nos por mira con Gabinete Mike Eman II keto bay no kier cumpli cu e condicionnan stipula den e protocol firma na mei 2015.
CAft a duna gobierno di Aruba un mensahe cla y raspa: corta bo gastonan y percura pa aumenta bo entradanan.
Minister Angel Bemudez parce di a pone e conseho aki un banda, pasobra enbes di austerisacion,  a hustamente trata na aumenta e gastonan mas, mientras cu Mike Eman ta purba di gana tempo pa evita cu e medidanan ta wordo imponi, alomenos prome cu aña caba.

Si tuma medida mes, esaki ta wordo presenta den un teblachi di oro y cu strooimento di santo den wowo di pueblo.
Un ehempel ta e cambio di ley di winstbelasting cu a wordo trata dia 17 di november den nos parlamento.
Esaki a wordo bendi como un gran logro pa e sector comercial y un suavisamento di e presion di belasting riba e empresario, pero deliberadamente a lubida di informa e consecuencia cu e cambio di e proceso di aangifte di winstbelasting lo bay tin pa e empresario.

Manera UPP ta comprende, ta parce cu, sin cu a termina cu e proceso di legalisacion, Belastingdienst a bay over na saca aangifte pa e negoshinan, na unda cu ya caba pa fin di aña e companianan aki mester paga nan winstbelasting over di aña 2014, y na mei 2016, esun di 2015. Riba su mes kizas un cambio cu lo por ta bentahoso pa gobierno, ya cu e lo por cobra su placa mas tempran y liher, pero henter e introduccion a bay sin ningun splicacion, sin ningun "overgangsbepaling".
Pues atrobe pecando contra principionan di "Good Governance"!
Tampoco a tene cuenta cu e tempo dificil cu comercio ta confrontando awor aki, ni tampoco cu e impacto cu e acto aki lo tin riba e negoshinan y riba e cuponan di trabou.
Ta hopi remarcabel cu un biaha mas gremionan comercial ta kedando keto.

Mientras tanto e necesidad pa haya mas placa ta keda presiona gobierno.
Mike Eman a hasta laga su vision "green" un banda, y ta ansiosamente wardando riba tanto e deal cu Citgo, y alabes riba e raport final riba e posibilidad cu lo por tin gas den nos subsuelo, cu lo duna su gobernacion un poco rosea.

E ansha a yega tambe na tal extremo cu de facto patrimonionan nacional awor ta coriendo peliger.
Asina UPP ta na altura, cu enbes di baha gasto, hustamente tin intencion di saca p.e. servicionan di gobierno grandi for di edificionan propio, y pone nan den edificio di huur, pa asina por deshaci di e propiedadnan aki dor di bende esaki y haci placa.
Tambe nos por a tende di e rumor cu ELMAR tambe lo ta coriendo peliger, mientras nos por a mira den un editorial un atake frontal riba WEB, pasobra gobierno lo no tin grip riba loke ta sosediendo eyden.
Lesando “tussen de regels door”, bo por sinti caba e direccion di e pensamento cu sea mester bin un otro compania, of lo ta bon pa privatisa WEB completamente.

Pueblo mester por para mas deroche di placa y e bendemento di nos patrimonionan di pueblo na compinchinan.
Pueblo mester exigi cu si tin di paga mes, e gobierno aki no ta esun cu tin di sigui maneha nos fondonan publico, y cu no mester bin mas medida, sino bahamento di gastonan innecesario.
UPP ta mira cu despues di hinca e pueblo den un debacle financiero nunca bisto, e trabou pa e gobierno cu mester bay ruim op de boel, lo ta hopi dificil.
P’esey UPP ta urgi tambe pa den e cuadro ey bin cu un gobierno di transicion, cu ta consisti di expertonan cu lo tin como tarea defini e cuadro financiero pa nos pais pa e añanan nos dilanti, pero tambe implementa e condicionnan cu lo mara man di e politico.

Finalmente mester entama un investigacion riba proyectonan y manehonan cu e gobierno aki a bin ta hiba.
Y esaki por ser logra unicamente si nos por logra un UNION pa yega na un Compromiso Nacional pa bin cu cambionan fundamental pa medio di introduccion di reglanan di "Good Governance" manera Nacionnan Uni ta prescribi.
Esaki ta e alternativa cu nos pueblo ta sperando di e mundo politico.


Den nomber di Union Patriotico Progresista – U.P.P.
Candelario A. S. D. – Booshi – Wever
Brazil, december 10, 2015

Expresionnan haci den e articulo aki no necesariamente ta refleha opinion di ArenaPoliti.co