ORANJESTAD - Prome cu e delegacion di Aruba a bandona Paris despues di reunionnan intensivo na COP21 di Nacionnan Uni, unda a discuti ampliamente y den tur forma e menasa di cambio di clima y su efectonan, Prome Minister Eman, kende tabatin un rol importante durante e cumbre aki, a duna su version di loke el a experencia na Paris y unda Aruba ta para den e discusionnan aki. 196 pais na mundo e participa den COP21 cu diasabra a termina cu un bon acuerdo. Presencia di Aruba a haya su debido atencion y esey ta importante.

“Aruba a marca un ambicion hopi cla aki pa na 2020 ta totalmente sostenibel”, Eman a bisa. Meta principal di e cumbre ta con limita emision di CO2 y di e forma aki minimalisa e efectonan di e cambio di clima cu ta tumando lugar. “Hopi pais ta sinti e efectonan caba di e cambio aki. Tempestadnan, pero tambe otro sorto di desasternan di naturaleza hopi pisa ta azotando paisnan rond mundo. Tur esaki ta wordo relata na e hecho cu e clima ta cambiando door di global warming. E capa di proteccion ta afecta door di tur emision di carbon cu tin. Pa mundo esaki ta nifica un peliger su existencia. Islanan cu ta forma parti di SIDS (Small Island Developing States) y specialmente esnan den Pacifico ya caba ta sinti y mira e efectonan, pa motibo cu e nivel di awa di lama ta subiendo. Esaki ta cambia nan bida door cu entre otro nan agricultura ta wordo afecta.”

Eman a bisa cu e impacto di emision di carbon ‘carbon footprint’ di Aruba como isla chikito ta minimal.   “Sinembargo Aruba su ambicion ta pa na 2020 ta totalmente sostenibel den produccion di nos propio energia, basa riba energia renobabel. Esaki ta e enfoke grandi di COP21 y door di esey Aruba ta hayando hopi atencion y apoyo mes pa su vision.” Banda di e palabranan di elogio y sosten Aruba ta hayando tambe hopi oferta di ayudo pa logra e meta di 2020. “Cu SIDS nos tin hopi intercambio di informacion. Nos ta comparti hopi cos cu otro, manera nos metanan. Otro aña mi ta presidencia e grupo di SIDS dentro di e contexto di Union Europeo, OCTA. E organisacion aki ta bay enfoca tambe riba sostenibilidad, hustamente den e periodo cu nos di Aruba ta carga su presidencia y na mes momento cu Hulanda tin presidencia di Union Europeo.Esaki ta un momento di synergia grandi unda nos por haci hopi cos hunto den contexto di Reino y Union Europeo.”

Na final Eman a bisa di ta contento cu hunto cu su delegacion e por tabata na COP21 pa mustra eynan kico tur Aruba ta haciendo, pero tambe pa a haya hopi mas informacion con haci e meta di Aruba factibel. Sin duda e cumbre, cu tabatin un final exitoso, tin su frutonan pa mundo.

Expresionnan haci den e articulo aki no necesariamente ta refleha opinion di ArenaPoliti.co