Parlamentario mr. Xiomara Maduro:

Presidente di Parlamento ta stroba e trabou parlamentario cu su weganan politico

Na mas di un ocacion nos a yega di denuncia na Pueblo di Aruba cu nos Presidente di Parlamento no ta compronde su trabou y ta scohe pa malusa e pocicion pa metanan di politica partidista treciendo e democracia parlamentario di nos Pais den peliger. E Presidente aki parce di no kier realisa, pero e ta haciendo hopi danio na e instituto di Parlamento cu su weganan politico. E ta stroba e trabou parlamentario y cu esaki ta trece democracia di nos Pais na peliger cu su weganan politico.

Keda sin yama reunion publico conforme ley

Articulo 23 inciso 3 di e Ley di Reglamento di Ordo di Parlamento di Aruba ta prescirbi cu ora un peticion wordo haci pa e miembronan di Parlamento pa un reunion publico, esaki mester wordo yama dentro di 30 dia cu e peticion wordo haci. Nos Fraccion di MEP tin un lista di reunionnan cu nos a pidi y Presidente di Parlamento no ta yama nan. Nos a pidi reunion riba problema cu asbest, ciere di Valero, cobransa di sushi, situacion na dump, abuso policial di dia 1 di oktober 2014, hedging y ultimo riba escalacion di crimininalidad pa menciona algun, pero niun ta wordo yama. Cada ves cu nos reclama, e Presidente ta bin cu e excusa cu Parlamento no tin suficiente griffier y tampoco personal pa atende reunion. Un excusa flauw, ya cu reunion publico pa temanan di menos importancia si ta wordo yama. E ta e prerogativo berdad di Presidente pa dicidi ki dia e ta yama un reunion, pero e Presidente NO por para riba e Ley di Reglamento di Ordo cu ta oblige di yama e reunion dentro di 30 dia.

Yama encuentro enves di reunion publico

Un otro wega politico hopi aplica pa Presidente di Parlamento ta pa no honra peticionnan di Fraccion di MEP pa reunion publico riba tema cu ta biba den comunidad. Enves di yama e reunionan publico Presidente ta core yama encuentro cu e Minister encarga pa asina evita cu Parlamentario por bay den debate cu e Minister of entrega mocionnan cu instruccion na e Minister concerni. Awor mes nos Fraccion di MEP a pidi un reunion publico urgente pa trata e escalacion di criminalidad na nos Pais y e Presidente a djies ignora esaki y a core yama un un ecuentro enves di e reunion publico cu a ser pidi conforme Ley. E ta bisto cu e Presidente aki kier haci un wega politico pa evita cu Parlamento por drenta den debate cu Minister Dowers y pa asina e mandatario aki no core riesgo di perde cara politico den Pueblo.

E Presidente ta stroba e trabou parlamentario

Kedando sin yama e reunionnan cu Fraccion di MEP ta pidi y yamando encuentro enves di reunion publico pidi conforme ley, ta stroba e trabou parlamentario. Mester bisa cu e ta un berguensa cu na 2015 nos Pais tin un Presidente di Parlamento cu ta presta su mes pa stroba e trabou parlamentario di opocicion. Ta parce manera cu su ‘masters voice’ ta zona duro den su cabes y ta pisa mas den su consenshi cu e huramentacion haci pa representa y traha conforme Ley na bienestar di e democracia di nos Pais y pa bienestar di e Pueblo di Aruba.