Andin Bikker a splica den rueda di prensa semanal di PDR cu tabata tin un mal comprendimento door di MEP relaciona cu e proyecto di fast ferry cu nan a interpreta como cu si e ferry bin no por habri e refineria bek.
Bikker a bisa cu un proyecto no ta interferi cu e otro y cu el a splica esaki claramente na partido MEP.
No ta trata di un proyecto cu gobierno of sector priva ta lobby pa logre. Bikker a bisa cu na mundo tin varios pais cu tin fast ferry, un di nan ta Islas Canarias caminda e ta funciona bon.
Pa un proyecto asina funciona bon no mester tuma mas di 18 of 20 minuut pa e ferry yega un destino y bay back pasobra e distancia no ta bay duna pa un servicio dos of tres bez pa dia of tres den caso Saba y St. Maarten, Bikker a bisa.
Papel di gobiernonan ta acelera e proceso na imigracion y douane usando tecnologianan nobo pa rapidamente haci un fast turn around.
E otro asunto ta unda e ta bin. Bikker ta haya cu mester separa e proyecto di fast ferry mes for di e location unda e ta bin. Segun estudio San Nicolas ta e Puerto ideal pa su cercania cu nos hermana isla Korsow. Fuera di esey e lo nifica un desaroyo economico pa San Nicolas banda di e refineria.
Bikker a bisa cu gobierno no a papia di unda e fast ferry mester bin, e tin entendi cu ta APA cu pa ley ta maneha nos wafnan, y cu nan a papia cu CITCO caba, mirando cu door di reapertura di e refineria e terenonan mester bin back pa gobierno pa nan pasa pa e operador nobo, y como cu tin terenonan di e refineria cu no mester pa su operacion por puntra e operador nobo pa facilita un parti pa acomoda e ferry y traha un waf chikito pa otro proyectonan na San Nicolas.
Bikker a bisa cu tur pais den Reino Hulandes a firma e documento cu e fast ferry mester bin y no tin discusion ni desunion den esaki. Ideal ta pa e bin na San Nicolas pasobra e ta hopi cerca di Korsow y pa duna e area aki un empuhe pero si e mester bin un tiki mas pabao di San Nicolas no tin ningun problema, Andin Bikker ta remarca.

Expresionnan haci den e articulo aki no necesariamente ta refleha opinion di ArenaPoliti.co