Rene Herde (AVP): Fondo di pension ta sigura
E reforma di e fondo di pensioen di APFA cu ta wordo trata den parlamento dialuna awor, ta nifica cu e inseguridad di si por paga e pensioen di pensionadonan tur luna awor y den futuro, ta yega su fin. Cu e ley nobo, e cobertura di e fondo ta yega 100% y e pago di pensioennan ta sigura pa tur luna. Sin cu mester a corta den e pensioen cu pensionadonan ta cobra tur luna. E reforma aki ta nifica tambe cu e riesgo grandi pa e fondo y pa finansa publico di nos pais ta wordo elimina. E falta di placa pa cubri e pensioennan cu tabata 800 miyon apenas cinco aña pasa ora MEP a sali for di gobierno, awor ta keda elimina cu e ley nobo. Riba e grafico akibou por mira cuanto e deficit tabata y cuanto e lo ta for di januari awor 2014, ora e ley nobo drenta na vigor.
800MIYON
E suma di 800 miyon florin, ta equivalente na 16% di e GDP di nos pais. E ta 20.7% di nos debe nacional. Kier men cu e ta un suma grandi cu ta wordo paga pa kita un riesgo grandi pa e pensionnan den e fondo di APFA. Cu esaki ta sigura e pago di pensioen di e pensionadonan actual y esnan di futoro pa hopi aña y ta kita e inseguridad cu tabata reina for di 2008. E situacion di bancarota pa e fondonan di pensioen di behez y di APFA ta keda elimina completamente den apenas cinco aña di AVP. E fondo di pensioen di behez ta duna resultado positivo di recuperasion y ta anticipa cu e fondo lo por cuminsa crea reserva na fin di 2017. Esaki ta sosode sin corta den e suma di pensioen cu ta cobra tur luna, manera si a sosode den otro paisnan. E motibo pa e mehoracion aki ta entre otro door di cu economia ta crece y mas hende ta traha atrobe. E fondo di pensioen di trahadornan di gobierno y maestronan di scol (APFA) awor tambe ta sali for di e peliger di bancarota cu e tabata na 2008 bou di gobierno di MEP y ta yega su cobertura di 100% atrobe. Tur esaki den cinco aña di gobierno di AVP. Di berdad pueblo ta wak unda su placa ta bay!
Expresionnan haci den e articulo aki no necesariamente ta refleha opinion di ArenaPoliti.co