Endy Croes (MEP): “MEP ta e unico alternativa pa scapa Aruba un biaha mas”
![EndyCroes04](/images/2016-press/EndyCroes04.jpg)
Lo percura pa baha costo di bida inmediatamente una vez den gobierno
Analisando ultimo desaroyonan politico nos por constata cu Pueblo ta bibando den un incertidumbre y caos total cu AVP a crea. AVP ta e constructor di MEGA DEBE cual a hinca Aruba den den e situacion actual. Algo cu ta resalta unda cu bo bay ta e costo di bida cu ta asina halto cu ya placa no ta yega mas pa e famia humilde. Aruba ta out of control. Prijsnan te hasta di productonan cu mester ta controla ta diferencia manero shelo y tera den cada supermercado. MEP como un partido Social Democrata unda e ser humano ta para central lo percura pa trece alivio atrobe pa pueblo di Aruba hibando un maneho cu tur dignidad, igualdad y mas cu claro treciendo bek e solidarismo den pueblo. Bisiña mester ta dispuesto di yuda bisiña bek. Famianan mester uni mas cu nunca pa hunto nos rescata e pais aki for di gara di AVP kende ta practicando un maneho neoliberal. Con MEP lo logra controla costo di bida? Mesora lo amplia e canasta basico di productonan di promer necesidad y lo percura pa un “SWAT” team ta riba caya pa controla prijsnan den tur supermercado. Lo percura realmente pa baha prijs di awa y coriente cual tambe lo refleha bek den costo di bida y mas placa den bo cartera. Lo busca tur alternativa pa stop hedging di Mike de Meza y AVP y e abuso cu awe prijs di crudo ta na 30 US dollar y Aruba ta pagando 90 US dollar pa 3 aña largo riba lomba di pueblo. Esaki ta crea espacio pa un reduccion substancial y lo refleha hasta den prijs di gasolin cual tambe ta un balor agrega pa bo cartera. Lo keda explora e posibilidadnan di Hydrocabel adicionalmente. MEP lo “elimina” belasting riba pensioen di biehez creando mas espacio den cartera di nos grandinan cu ya a contribui henter nan bida. Pues entre otro cu e ehercicionnan aki inmediatamente MEP lo baha costo di bida unda e pueblo lo conoce un alivio al instante. MEP ta determina den su accionnan y pueblo finalmente lo por biba feliz atrobe cu un sonrisa riba nan cara.
Expresionnan haci den e articulo aki no necesariamente ta refleha opinion di ArenaPoliti.co