Partido MEP y partido AVP mester custumbra cu Partido Democracia Real ta un poder riba su mes. Cu e expresion aki Andin Bikker, lider di PDR a cuminza su rueda di prensa diamars mainta.

Bikker a bisa cu tur dos partido aki mester cuminza custumbra cu PDR ta e alternativa y no tin otro, ningun partido soña cu lo wordo lanta, etc.

Den tres eleccion consecutivamente pueblo a duna PDR sosten, y pa e siguiente eleccion pueblo lo wak den PDR su direccion como alternativa.
Manera aña a habri un delegacion di Parlamento di Aruba a bay Sint Maarten caminda MEP y AVP a bay solamente pa geschilregeling cu nan ta nan bandera, pero PDR a bin cu tres propuesta. Pues di 4 tema cu e delegacion di Aruba a bay cune tres a worde lidera pa Democracia Real, segun Andin Bikker. Den reunionnan di Parlamento e nivel cu MEP y AVP ta hiba den nan discusion ta worde desaproba y hasta tin un cantica den carnaval cu ta papia di bullying den parlamento, pero no ta PDR ta crea esaki, sino MEP y AVP.

Bikker a bolbe bisa cu e dos partidonan aki mester custumbra cu PDR ta e tercer poder politico riba su mes y no ta cana den sombra di ningun hende.

Na lugar di pleita den reunionnan di parlamento PDR a bin cu un propuesta pa cambia e ordenanza di parlamento, pa haci e reunionnan mas eficiente y eficaz y hende haya gana di bolbe wak canal 46.

Bikker a reacciona riba un remarca di prensa y el a bisa cu nan ta reinforzando e team. Nan ta conoci cu semper ta presenta 29 candidato y awor ta bay bin cu caranan nobo ampliamente conoci den pueblo y cu ta bin cu ideanan nobo.

Bikker a bisa tambe cu PDR ta e unico cu a presenta un plan di rescate economico y a lidera e reapertura di e refineria, cu por fin gobierno a scucha y awor ta riba e caminda di esaki.

Economia ta e problema primordial di nos pais, pasobra gobierno no a atende cu esaki y mas ainda e presupuesto di 2014 te 2016 ta mustra con e debt service a crece cu 30 miyon florin, esta den apenas 1 aña y mey. Bon di PDR ta cu nan no ta un partido cu ta sinta critica y enfoca riba bida personal di hende, pero ta busca solucion pa medio di amienda, etc., y entre otro nan plan di rescate.

Expresionnan haci den e articulo aki no necesariamente ta refleha opinion di ArenaPoliti.co