Siguridad di Pueblo di Aruba ta sufriendo. Criminalidad a yega na un punto record bao maneho di Dowers y Mike. Hopi promesa pero enrealidad e pueblo ta pagando e prijs caro pa “mismanagement”. Dowers y Mike no tabata y ainda no tin un plan. Atraco a bira manera ordo di dia. Autonan ta wordo horta tur dia y casnan ta wordo kibra y terorisa tur dia. AVP su unico maneho ta core tras di e criminal despues cu e daño ta haci caba y es mas, sin por haña nan.  Den 6 aña di AVP - separa cu nos debe financiero a redobla conociendo asina e MEGA DEBE - cifranan di atraco y criminalidad tambe a redobla y ta espantoso. Pesey MEP ta bogando pa pone un punto final tras di e maneho cu a deteriora nos pais. No mas EMANIPULACION!

Di inmediato MEP lo percura pa mas “Blauw” esta mas polis ta visibel bek riba caya. MEP lo percura pa Aruba tin su radar bek y lo cuida nos frontera.  Helicopter lo tey bek pa yuda cuida nos baranca. MEP lo percura pa Warda nos Costa tin material y e autoridad pa por eherce nan trabao debidamente. Team special pa cuida area di Hotel y nos turistanan. Team special di propio hendenan den bario pa cuida bario.  MEP lo promove solidarismo y union uniendo e pueblo aki unda bisiñanan lo mester tin mas atencion pa otro. MEP lo enfoca  fuertemente riba un maneho preventivo. No solamente core tras di e ladron pero brinda e oportunidad cu e ladron no mester horta mas.  Den combinacion cu esaki lo bin cu proyectonan real cual lo crea cuponan di trabao. Un pueblo cu ta traha no  mester horta pa sobrevivi.  MEP bek den gobierno e ser humano lo ta central y lo inverti pa e pueblo aki por recobra su trankilidad.

Expresionnan haci den e articulo aki no necesariamente ta refleha opinion di ArenaPoliti.co