Durante tratamento di presupuesto 2016 Minister Eman a cuminsa su disertacion papiando riba union y pakiko esaki na e momentonan aki ta asina necesario na nos Pais. Pero manera custumber nos Prome Minister no a lage na palabranan elocuente di union pero den e mesun speech a bira lastra esnan di opocicion y bay busca fayo den e 8 añanan di gobernacion di MEP. Tur esaki pa desvia atencion na locual ta e berdad amargo di su fayo pa goberna nos Pais debidamente. Pero Minister Eman no a keda eynan. Pa desvia e atencion publico un tiki mas di e discucion riba e resultado di su mal maneho financiero, nos Prome Minister ta bay mas lew door di hasta recuri na strategianan di 'verdeel en heers' e opocicion di nos Pais cu e speransa cu asina e no lo wordo critica. Ta hustamente e wega politico di 'verdeel en heers' cu Minister Eman ta practica ta locual ta manipula e mente di nos Pueblo y ta stroba nos Pais di progresa.

Pasa saluda pa saca potret scondi
Ultimo aki mes Minister Eman a tuma riba dje pa pasa saluda nos di opocicion promer cu reunion pa asina den forma scondi un coordinador por saca un potret di e saludo pa despues difundi esaki den media social pa crea e imprecion cu opocicion ta na su banda of cu e critica cu wordo treci dilanti no tin balor ya cu tur ta sinta hari of brasa Minister Eman toch. E meta cu cual ta usa e strategia aki ta netamente pa crea duda y bruha tera serca e sostenedornan di opocicion pa asina purba debilita nan mensahe den e mente di e Pueblo. Mester remarca cu e ta un berguensa cu Minister Eman mester recuri na e tipo di strategia di shisheria aki. E ta muestra si cu su palabranan riba e union cu tin mester den politica na nos Pais no tin balor alguno y cu ta un simpel 'salespitch' populista e ta pa gana e simpatia perdi den Pueblo.

Minister Eman a faya
E ta tristo pa mira cu Minister Eman no tin fin di acepta cu ela faya den maneha nos Pais. Nos di opocicion a mustre esey cu argumento basa riba cifra di Banco Central y rapport di CAFT cu e mes a firma pe. Pesey e triki di bin saca potret scondi pa purba trece nos palabra den duda no ta surti. Mescos cu e triki di bin saluda y pone man riba schouder pa indica cu e ta keda ariba y tur mundo ta abou tampoco no ta traha. Cu nos man riba e schouder di Minister Eman nos a mustre cu su lugar no ta riba e Pueblo aki y cu e berdad semper lo ta riba tur e mentiranan cu e ta trece dilanti.

Nos Pais merece progreso
Ta bira ora pa bin mas seriedad den gobernacion ya cu nos Pais merece progreso. E weganan politico di Minister Eman di 'verdeel en heers' nos Pueblo djies pa ganancia politico ya a causa demasiado daño caba y mester stop. Ta ora pa hisa e nivel di hiba politica na nos Pais y di duna e palabra union un contenido real.

4 februari 2016

Expresionnan haci den e articulo aki no necesariamente ta refleha opinion di ArenaPoliti.co