ORANJESTAD -- Na inicio di gobernacion di Gabinete Mike Eman I,  tabata tin dos opcion riba tereno di finansa publico: of ta reduci e deficit den un aña door di aumenta impuesto, of ta reduci e deficit di un manera sostenibel door di jumpstart e economia y  mercado laboral, crea e clima pa actividadnan economico sostenibel y elimina riesgonan riba tereno financiero door di introduci reformanan structural.

Tabata añanan yena di oportunidad y reto. Un di e retonan grandi tabata pa contene efectonan di ciere definitivo di refineria Valero riba finansas publico, como tambe mitiga e riesgonan riba finanzas publico di Aruba. Si compara inicio di gobernacion di e prome Gabinete Mike Eman cu un deficit structural di casi -9.4% di GDPy e deficit di -2% di GDP na 2016 no por conclui otro cu e trabou haci ta resulta den un finanzas publico sostenibel. Apesar di tur e retonan cu gobierno a haya su mes confronta cu nan den e añanan tras di lomba.

Prome Minister Eman: "Un y tur por a constata cu for di aña 2010, finanzas publico di Aruba ta wordo maneha riba un manera responsabel. Si nos analisa e situacion por conclui cu ta trata aki di un logro hopi importante cu un resultado sumamente positivo riba tereno financiero, como tambe economico. Cu e cuadro financiero cu gobierno a presenta pa e periodo 2013-2017, como tambe e acuerdo di presupuesto balansa cu un maximo di gasto, tin un perspectiva pa un reduccion real di e debe di gobierno pa prome biaha den historia. E introduccion di e reglanan di presupuesto balansa lo sa di sostene e maneho cu ta wordo hiba for di 2010."

Prome cu 2010, e dos gabinetenan a prefera di no enfrenta e reformanan necesario. E actual gobierno a afronta esakinan di manera diligente y pro-activo. “Nos a atende cu retonan hopi grandi cu fondonan di pensioen general y di empleadonan publico, como tambe e fondo di seguro medico”, Premier Eman a splica. E cuadro financiero 2016-2018 lo garantiza cu e efectonan di e reformanan structural cu a trece cu nan cambionan significante den e direccion di nos finanzas publico y e sacrificionan cu esakinan a nifica pa hopi di nos, lo no bay perdi.

E reformanan di e fondonan social manera SVb y AZV como tambe e fondo di pensioen APFA a wordo logra danki na e trabounan inmenso di e actual Gobierno di Aruba en combinacion cu Dialogo Social. Aki a evita un desaster financierio-economico pa nos pais caminda e debe nacional lo a surpasa 100% di nos GDP prome si no a bin cambio den e maneho. Presupuesto 2016 ta cumpli cu tur reto y vision di loke gobierno a pone su dilanti.

Expresionnan haci den e articulo aki no necesariamente ta refleha opinion di ArenaPoliti.co