E mayoria den Parlamento diahuebs marduga a aproba e cambionan den presupuesto 2014. Un reunion di nivel hopi abou, especialmente di parti di e ministernan de Mesa, Sievinger y Oduber cu a papia oras sin toca e tema di presupuesto ni e KB, sino mas bien a keda pega den anjanan biew y a lansa atakenan personal, especialmente contra lider di MEP Evelyn Wever-Croes.

Fraccion di MEP a vota contra e cambionan, pasobra nan no ta refleha un repartición husto: pueblo mester hala faha mara, medidanan mester wordo tuma contra pueblo, y mester aumenta e BBO, pero gobierno mes no ta hala faha mara. Ministernan y nan coordinadornan ta sigi biaha y sigi fiesta, y ainda no kier paha di 9 pa 7 minister.

"Cu esaki porfin ta yegando un final na e "pesadiya" cu a cuminsa na juli 2014 y cu a desemboca den e welga di hamber di prome minister Mike Eman, algo sigur hopi bergonsoso pa su mes, pa su partido y pa henter Aruba. Un hecho cu a marca e comienso di e decadencia den partido AVP mirando cuanto sostenedor di e partido a desaproba esaki. Mi ta lamenta e nivel di e reunion, y cu Presidente di Parlamento no por a controla. Su envidia pa cu nos partido y especialmente contra mi persona ainda ta bisto. Hopi hende a puntrami dicon ami no ta ataca oponentenan tambe cu temanan personal of contra nan famia. Mi contesta ta simple: ami no mester desvia atencion, y ataca otronan, pasobra na prome lugar e no ta mi estilo di hiba politica; ta nan ta den politica, no nan casa, ruman of tata. Y no ta pasobra e ministernan y algún oponente ta lastra nan mes den lodo, kiermeen cu ami tambe mester hasi’e. Ademas, tin asina tanto ehempel di mal gobernacion pa cuestiona, cu mi no mester inventa mas issues. Mi ta lamenta e forma personal cu nan a ataca nos, pero mi ta sigur cu pueblo lo sa di husga na final. 

Un "pesadiya" ta yegando su final, y ohala e gobierno di Mike Eman stop di busca confrontación cu Hulanda. Ohala cu e gobierno por atende cu e problemanan real di nos pais, cu ta hopi. Nos ta spera cu e control di CFT cu lo tuma lugar awor, desemboca den e firmamento di e presupuesto 2014 y cu atencion wordo poni riba  esun di 2015. Y ohala cu e "pesadiya" aki ta un senjal cu Aruba ta exigi un bon gobernacion, y cu e gobierno no por sigi mas cu e mal maneho financiero mas. E rumbo pa rescata nos pais financieramente a cuminsa danki na interferencia di Gobernador Freddis Refunjol, y ohala tambe, e rumbo pa soluciona e crisis constitucional. Un trayectoria cu indudablemente lo ta uno duro y dificil, pero cu fe den Dios, lo trese nos pais bek na caminda cu e tabata na anja 2009", tabata e declaracion di  Evelyn Wever-Croes.

Expresionnan haci den e articulo aki no necesariamente ta refleha opinion di ArenaPoliti.co