Como gobernante di un Pais bo no por haci deshaci. Pueblo ta spera di tur Minister cu nan ta goberna respentando e leynan di nos Pais y cu nan ta tene nan mes tambe na tur e principionan di bon gobernacion. E Minister cu no ta respeta nos leynan y cu no ta tene su mes na e principionan di bon gobernacion simplemente no ta integro. E manera cu Minister Otmar ta probecha di su pocicion como minister pa purba fix su mes un tereno di huur via su collega Minister Sevinger, ta contra tur principio di bon gobernacion. Minister Otmar cu su peticion pa tereno di huur ta atacha e integridad di gobernacion. 

Pocicion previlegia 
Minister Otmar mester compronde cu e no ta un cuidadano of cunukero comun y coriente. E ta e Minister encarga cu e cartera di Cria, Pesca y Agricultura. E mandatario ta den un pocicion previligia den nos comunidad pa cual Pueblo ta spera cu Minister Otmar ta actua na un forma integro y no ta bay abusa di su pocicion pa yega na por ehempel tereno di huur. Specialmente si nos tene na cuenta cuanto tereno di huur su collega Minister Sevinger a kita ultimo tempo di e cuidadano comun y coriente y cuanto agricultor no por yega na un tereno di huur facilmente, e ta un bofta den nan cara cu e propio Minister encarga cu Cria y Agricultura ta bay haci un peticion y ta bira haya aprobacion pe tambe di su collega Minster Sevinger den solamente un dia di tempo. Enves cu Minister Otmar a sali na defensa di esnan cu a perde nan tereno di huur, e mandatario ta malusa su pocicion previligia pa stroba esnan cu peticion haci promer cune y tur esaki djies pa interes propio. 

Falta di integridad
E solo hecho cu Minister Otmar ta bira haci e peticion pa tereno di huur siendo cu e ta e mandatario encarga cu esnan cu ta haci uso di tereno di huur, ta trece duda grandi den su integridad como gobernante y ta atacha e intergidad di e gobernacion di Gabinete Eman. Ta hopi lamentabel cu Minister Otmar mes su collega Sevinger y niun otro exponente di AVP no ta realisa cu ta contra principio di bon gobernacion pa malusa e pocicion di Minister pa yega na tereno. E ta muestra cu ta integridad ta locual ainda falta!


25 februari 2016

Expresionnan haci den e articulo aki no necesariamente ta refleha opinion di ArenaPoliti.co